Франция автомобилсозлик ва мудофаа компаниялари Украина ҳудудида дронлар ишлаб чиқармоқчи. Бу ҳақда Euronews хабар берди.
Франция жамоат радиоси 8 июнь куни автомобиль ишлаб чиқарувчи Renault Group Украинада дрон ишлаб чиқаришини оммага маълум қилган. Франция қуролли кучлари вазири Себастьян Лекорну буни “ҳар икки томонга фойда келтирадиган лойиҳа” деб атаган.
“Биз мутлақо мисли кўрилмаган ҳамкорликка киришмоқчимиз. Унда француз автомобилларини ишлаб чиқарувчи йирик компания Украина билан ўз кучларни бирлаштиради. Дронлар украиналиклар учун мўлжалланади, бироқ биз уларни ўз француз армиямизга ҳам тақдим этмоқчимиз. Шунда доимий тактик ва тезкор тайёргарликка эга бўламиз. Экспертлик ва ишчи кучига келсак, ишлаб чиқариш украиналикларнинг зиммасида бўлади: улар дронлар ишлаб чиқаришда биздан моҳирроқ”, деди вазир.
5 июнь куни Брюсселда Украина ва Франция мудофаа вазирлари ўртасида Украина мудофаа эҳтиёжлари учун қуролларни биргаликда ишлаб чиқариш бўйича музокаралар бўлиб ўтган эди.
“Биз бу имкониятни энг яхши ишлаб чиқарувчиларга таклиф қилишга тайёрмиз. Украина жанговар тажрибага, Франция эса мустаҳкам саноат базасига эга. Бу стратегик ва ўзаро манфаатли ҳамкорликдир” дея таъкидлади Украина мудофаа вазири Рустем Умариеров.
Франция армиясида бир неча минг дрон (армия учун 3 минг) бўлса-да, Украина 2025 йилгача 4,5 миллиондан ортиқ дронлардан фойдаланмоқчи. Улар фронт чизиғидаги душман техникасининг 70 фоизини йўқ қилади.
НАТО штаб-квартирасида бўлиб ўтган 28-Рамштайн йиғилишида Украина ва унинг ҳамкорлари ҳам қурол ишлаб чиқариш механизмини йўлга қўйишга қарор қилганди.
Финляндия украиналиклар билан ҳамкорликда Украина ва Европа Иттифоқи учун дронлар ишлаб чиқариш заводини ташкил этган. Оммавий ишлаб чиқариш 2025 йилда бошланиши режалаштирилган. Нидерландия дронлар технологиясини ривожлантириш ва Украина мудофаа саноатини қўллаб-қувватлаш учун 700 миллион евро (798 миллион доллар) сармоя киритишини эълон қилган.
Буюк Британия, шунингдек, 2025 йилда Украина учун дронлар ишлаб чиқаришни кўпайтириш учун юз миллионлаб доллар сармоя киритмоқда. Норвегия ҳам ўз маблағларини Украина дронларини ишлаб чиқаришни қўллаб-қувватлашга йўналтирган.
Изоҳ (0)