“Россия Европада янги ҳарбий операциялар тайёрлаётганига оид далилларга эгамиз” — Зеленский

Украина президенти Владимир Зеленский мамлакат разведкаси маълумотларига таяниб Россия Европа ҳудудида янги ҳарбий операцияларни тайёрлаётганини айтди. Бу ҳақда “Украинская правда” хабар берди.

Зеленский Мудофаа вазирлиги разведка бош бошқармаси бошлиғи Кирилл Буданов ҳисоботидан сўнг шундай баёнот берган.

Биз Россия раҳбариятининг ақлий таназзули чуқурлашаётганини кузатмоқдамиз ва уларнинг Европа ҳудудида янги ҳарбий операцияларни тайёрлаётганини тасдиқловчи далилларга эгамиз, деди Зеленский.

Шунингдек, сиёсатчи санкциялар Россия иқтисодиётига жиддий зарар етказаётганини таъкидлади. Президент бу халқаро босимни кучайтириш стратегиясининг тўғрилигини тасдиқлашини айтди.

Украина раҳбарига кўра, Киев разведка томонидан олинган фактлар ҳақида ҳамкорларини хабардор қилади. Мамлакат Европа ҳимоясини кучайтириш учун Буюк Британия ва Европа Иттифоқи билан қўшма қарорларни аллақачон тайёрламоқда.

Россиянинг бошқа давлатларга эҳтимолий ҳужуми: мавзуга оид янгиликлар

НАТО доираларидаги манбаларга кўра, Россия Финляндия ва НАТОнинг шарқий қанотидаги бошқа давлатларга ҳужум қилиш режасини ишлаб чиққан. Гап Россия армиясининг бир нечта бўлинмаларининг бир вақтнинг ўзида ҳужуми ҳақида кетмоқда. Унга ўн минглаб аскар жалб қилиниши эҳтимоли борлиги айтилган.

Financial Times нашрига кўра, Россия Япония ва Жанубий Корея билан эҳтимолий уруш учун нишонларнинг батафсил рўйхатини тузган. Рўйхатга 160 та ҳарбий ва фуқаролик инфратузилмаси объектлари — атом электр станциялари, кўприклар, заводлар ва қўмондонлик пунктлари киритилган. 2008–2014 йиллардаги махфий ҳужжатлар Х-101 ракеталари билан зарбалар беришни ва Япония ҳамда Жанубий Кореянинг ҳаво мудофаасини текширишни тасвирлайди.

Европа дипломатияси раҳбари Кая Каллас Россия 2028 йилдаёқ Европа иттифоқига ҳужум қилиши мумкинлигини айтиб, Европани мудофаа харажатларини оширишга чақирган. НАТО билан уруш 4-6 йилдан кейин бўлиши мумкинлиги таъкидланган.

Буюк Британия Россия ҳужумига тайёргарлик кўришни бошлади. Лондонда 2005 йилдан бери илк бор фавқулодда ҳолатдаги ҳаракатлар режаси қайта кўриб чиқилмоқда. У ядровий ҳужумга реакция ва бункерлардан фойдаланиш тартибини ўз ичига олади.