Польшадаги президентлик сайловининг иккинчи босқичида барча овозлар ҳисоблаб чиқилгач, консерватор Карол Навроцкий 50,89 фоиз овоз билан ғалаба қозонди. Бу ҳақда Gazeta Wyborcza хабар берди.
Польшада 1 июнь куни президентлик сайловларининг иккинчи босқичи бўлиб ўтди. Унда бош вазир Дональд Тускнинг Фуқаролик коалицияси партиясидан номзод Рафал Шасковский ва “Ҳуқуқ ва адолат” партияси томонидан қўллаб-қувватланган Карол Навроцкийга овоз берилди.
Сайловнинг биринчи босқичида Шасковский 31,36 фоиз билан ғалаба қозонганди, Навроцкий эса ундан 2 фоиздан камроқ, 29,54 фоиз билан ортда қолганди.
Навроцкий Украинага нисбатан қарама-қарши муносабатда
У Украинанинг тарихий муаммолар ҳал қилинмагунча НАТО ва Европа Иттифоқига аъзо бўлишига қарши чиққан. Қўшни республика “Волиндаги поляклар геноциди” учун жавобгарликни тан олиши керак, деб ҳисоблайди.
Навроцкийнинг позицияси Украина президенти Владимир Зеленский томонидан танқид қилинганди. У агар Украина Европа Иттифоқи ва НАТОга аъзо бўлмаса, Польшанинг бўлажак раҳбари “қўлида қурол билан ўз мамлакатини Россиядан ҳимоя қилиши” кераклигини айтганди.
Навроцкийнинг фикрича, Польша биринчи навбатда ўз хавфсизлиги ва манфаатлари ҳақида қайғуриши керак, Украинага ҳарбий ёрдам эса Польша армиясини заифлаштирмаслиги лозим. Иккинчи тур олдидан бўлиб ўтган теледебатларда у “Украина донининг Польша бозорини тўлдириб юборишига” ва адолатсиз рақобат яратишига қарши чиққанди.
2025 йил май ойида Навроцкий АҚШга ташриф буюриб, президент Дональд Трамп билан учрашганди. Америка президенти учрашувдан сўнг Навроцкий сайловларда “албатта ғалаба қозонишини” айтганди. Ўтган ҳафта эса АҚШ ички хавфсизлик вазири Кристи Ноэм Варшавада консерватив сиёсий ҳаракатлар бўйича халқаро конференцияда Навроцкийни мақтаб, полякларни унга овоз беришга чақирганди.
Россияда у Польша ҳудудидаги Қизил армия ёдгорликларини бузишга алоқадорлиги учун қидирувдаги шахслар рўйхатига киритилган. Навроцкий август ойида муддати тугаётган консерватор Анжей Дуда ўрнини эгаллайди.
Изоҳ (0)