“Эрик” тўфони Мексиканинг Оахака штатига 4-тоифали хавфли бўрон сифатида ёпирилди. Ҳудудда кучли шамол ва ёмғирларни қўзғатиб, мамлакатда йилнинг энг кучли бўрони деб топилди. Бу ҳақда CNN хабар берди.
Довул Мексиканинг Пунта Малдонадо шаҳридан, тахминан, 32 км шарққа эрталаб соат 6 дан кейин йўналган. Унинг марказида шамол тезлиги 201 км/соатга етган.
“Эрик” Мексикада июлгача содир бўлган биринчи йирик бўрон ҳисобланиб, у 3-тоифага кирарди. Аммо тўфон 19 июнь куни эрталаб қирғоқ яқинида 233 км/соат шамол тезлиги билан 4-тоифали шиддатли бўронга айланиб кетган.
У 17—18 июнь кунлари жуда тез кучайиб, атиги 24 соат ичида тропик бўрондан 4-тоифали бўронга айланган. Глобал исиш шароитида бундай табиий офатлар тез-тез ва янада кучайган ҳолда содир бўлмоқда.
Кучли ёмғир ва шамол Герреро ҳамда Оахака қирғоқларига таъсир кўрсатди, деди 19 июнь куни Мексика президенти Клаудия Шейнбаум. У аҳолини уйда қолишга ва ҳокимият кўрсатмаларига амал қилишга чақирган.
Акапулко порти 17 июнь куни кечқурун ёпилган. Гуэрреро штати ҳукумати Эвелин Салгадо Акапулко ва бошқа пляждаги барча ҳаракатлар кечки соат 8 да тўхтатилишини айтган. 18 июнь куни бутун штат бўйлаб мактаблар 1 кунга ёпилиши эълон қилинганди. Салгадонинг айтишича, Герреро бўйлаб одамлар учун 582 та бошпана ажратилган.
Шарқий Тинч океан бўронлари мавсуми май ойи ўрталарида бошланган. “Эрик” аллақачон мавсумнинг бешинчи бўрони ҳисобланади. Тўфон камида тропик бўрон кучига етганда номланади. Мексика ҳавзасида одатда июль ойининг ўрталаригача иккинчи довул бўлмас эди.
Герреро тоғли ҳудудларининг баъзи қисмларида ҳафта охиригача 16 дюймга яқин ёмғир ёғиши мумкин. Бу ҳаёт учун хавфли бўлган сув тошқини ёки селни келтириб чиқариши айтилган.
Изоҳ (0)