АҚШнинг Калифорния штати, шунингдек, Мексика ҳукумати “Хиллари” тўфони яқинлашишига ҳозирлик кўрмоқда, деб хабар берди Associated Press.
“Хиллари” якшанба куни Калифорния ярим оролига етиб бориши ва кейин шимолга қараб ҳаракатланиши кутилмоқда. Мазкур тўфон 84 йил ичида Жанубий Калифорнияга ёпирилган биринчи тропик тўфон сифатида тарихга кириши мумкин.
АҚШ Калифорниянинг катта қисмини тропик тўфондан огоҳлантирди. Лос-Анжелес расмийлари бошпана, касалхоналар ва озиқ-овқат захираларини тайёрламоқда. Маҳаллий шериф департаменти ходимлари уйсиз одамларни қидирмоқда ва уларга сув ҳавзаларидан узоқлашишни маслаҳат беришмоқда. Минтақада паст текисликда жойлашган аҳоли пунктларини ҳимоя қилиш мақсадида қум тўсиқлари мустаҳкамланмоқда. Шаҳарларда, шу жумладан Аризонада, сув тошқини содир бўлганда биноларни ҳимоя қилиш учун қум қоплари тарқатилмоқда.
Joshua Tree миллий боғи ва Mojave миллий ёввойи табиат қўриқхонаси ёпилган. SpaceX Калифорниянинг марказий қирғоқларидан сунъий йўлдош учирилишини камида душанба кунига қадар бекор қилди.
Бир кун аввал АҚШ президенти Жо Байден Фавқулодда вазиятларни бошқариш бўйича федерал агентлик ходимларини тўфон кутилаётган ҳудудларга жойлаштиргани ва керакли юкларни минтақага олиб борганини эълон қилган эди.
Изоҳ (0)