Вьетнамнинг марказий қисмини қамраб олган тўфон шамоллари ва ёмғирлар оқибатида 5 киши ҳалок бўлган ва яна 2 киши бедарак йўқолган. Бу ҳақда Arab News хабар берди.
Табиий офат оқибатида 70 минг гектардан ортиқ экин майдонларини сув босгани айтилмоқда. “Вутип” тўфони 14 июнь куни Хитойнинг жанубига соатига 128 километр тезликда шамол эсиши билан етиб келган ва Тонкин кўрфазининг Вьетнам қанотига ёпирилишидан кейин тропик бўронга айланган.
Вьетнам Қишлоқ хўжалиги вазирлиги 14 июнь куни кечқурун марказий Қуанг Три провинциясида 5 киши ҳалок бўлгани ва 2 киши бедарак йўқолганини маълум қилган.
Хитойнинг жанубий Хайнан оролидаги расмийлар жума куни бўрон кириб келишидан олдин минглаб одамларни эвакуация қилган, мактаблар ёпилган ва темирйўл қатнови тўхтатилган. Бирлашган тайфун огоҳлантириш маркази бўрон дам олиш кунлари охирига келиб сусайишини эълон қилган.
Табиий офатлар 2024 йили Ветнамда 514 кишининг ҳаётига зомин бўлганди. Бу 2023 йилга нисбатан 3 баравар кўп, дея хабар беради қишлоқ хўжалиги вазирлиги. Сентябрь ойида Вьетнам шимолида 345 кишининг ўлимига сабаб бўлган “Яги” тўфони тахминан 3,3 миллиард доллар иқтисодий зарар олиб келганди.
Изоҳ (0)