“Ҳелен” ва “Милтон” тўфонларидан жабр кўрган АҚШнинг Флорида штатида Vibrio vulnificus бактерияси юқиши оқибатида 13 киши ҳалок бўлди.
Соғлиқни сақлаш вазирлиги маълумотларига кўра, штатда жами 76 та касаллик ҳолати қайд этилган, бу ўтган йилга нисбатан 30 тага кўпдир.
New York Post нашрининг Флорида соғлиқни сақлаш департаментига таяниб ёзишича, бўронлардан кейин қолган сел сувлари турли бактериялар, жумладан, Vibrio vulnificus учун қулай яшаш жойига айланган. Мазкур вирус очиқ яраларга денгиз суви тегиши ёки хом денгиз маҳсулотларини истеъмол қилиш орқали юқиши мумкин. Аломатлар орасида иситма, титроқ, паст қон босими ва терининг шикастланиши мавжуд.
CNN маълумотларига кўра, 26 сентябрь куни Флорида штатида “Ҳелен” тўфони содир бўлганидан кейин Vibrio vulnificus инфекцияси билан касалланганлар сони 6 тадан 76 тага кўпайган. Сентябрь бошида бирорта ҳам касаллик қайд этилмаган Пинеллас округида 13 киши касалланган. Америка Касалликларни назорат қилиш ва олдини олиш маркази маълумотларига кўра, Қўшма Штатларда ўртача 150 тадан 250 тагача Vibrio vulnificus инфекциясини юқтириш ҳолатлари қайд этилган. Инфекция юққан ҳар бешинчи одам вафот этади.
Флоридада “Ҳелен” тўфони 200 кишининг ҳаётига зомин бўлган бўлса, 5 октябрда штатга ёпирилган Милтон тўфони оқибатида 17 киши ҳалок бўлди. Ҳисоботларга кўра, “Ҳелен” ва “Милтон”дан кўрилган зарар 195-230 миллиард долларни ташкил қилади.
Изоҳ (0)