Япония пойтахти томон ҳалокатли “Ампил” тўфони яқинлашмоқда. Бу ҳақда мамлакат маҳаллий нашрларига таяниб, Reuters манбаси хабар берди.
15 август куни мамлакат шарқидаги сувларда тўфон илк бор қайд этилган. Оқибатда авиакомпаниялар ёзги саёҳат мавсумининг энг юқори чўққисида ўз фаолиятининг бир қисмини чеклаш ва юзлаб рейсларни бекор қилишга мажбур бўлган.
Япония метеорология агентлиги (JМА) томонидан “кучли” деб таснифланган тўфон мамлакатнинг Тинч океани соҳилларидан тахминан 690 километр узоқликда шаклланган. Кучли ҳаво оқимлари туфайли “Ампил” шарқий ҳудуд бўйлаб Япония қуруқлиги томон ҳаракатлана бошлаган.
Япония маҳаллий манбалари тарқатган хабарларга кўра, “Ампил” тўфони сониясига 35 метрга етиши мумкин. Максимал шамол тезлиги эса 50 метр секунд бўлиши тахмин қилинган.
“Ушбу тўфон яқинлашаётгани муносабати билан биз жамоатчиликни бўронлар, баланд тўлқинлар ва кучли ёмғирларга қарши тайёр туришга чақирамиз. Пойтахт ва унга қўшни ҳудудларда фавқулодда ҳолат юз бериши мумкин”, дейилган Япония метеорология агентлиги хабарида.
Япониянинг асосий Japan Airlines авиакомпанияси 191 та ички ва 26 та халқаро рейсларни фавқулодда вазият сабаб бекор қилишни режалаштирган. Бошқа бир АNА авиакомпанияси ҳам 280 та ички рейслар кечиктирилишини эълон қилган.
Японияда “Ампил” тўфони сабаб темирйўллар фаолияти ҳам тўхтатилиши айтилган. Жумладан Токио ва Япониянинг саноат маркази Нагоя ўртасидаги “Шинкансен” тезюрар поездининг барча қатновлари тўхтатилган.
Изоҳ (0)