АҚШга ёпирилган “Милтон” тўфони 10 кишининг ўлимига сабаб бўлди, миллионлаб одамлар электрсиз қолди. Бу ҳақида NZ Herald сайти хабар қилди.
Тўфон вақтида Флоридада бўлган Янги Зеландиянинг 100 дан ортиқ фуқароси ҳам табиий офатдан жабр кўрган. Тўфон ҳалокатли сув тошқинларини келтириб чиқарган. Уйлар, бинолар ва стадионларга жиддий зарар етказган.
Флориданинг Атлантика океани соҳилидаги Сент-Люсия округида беш кишининг ўлими тасдиқланди, расмийлар торнадо кўтарилганини айтди.
Шунингдек, Сент-Питерсбург полицияси ўз шаҳрида тўфон оқибатида икки киши ҳалок бўлганини тасдиқлади. Волуси округи шерифи Майкл Ж.Читвуд эса уч кишининг ўлими ҳақида хабар берди.
Расмийлар тўфон қурбонлари бундан ҳам кўп бўлишини тахмин қилмоқда. Сент-Люсия округи шерифи Кейт Пирсон “Биз ҳали ‘Милтон’ тўфони оқибатларини тўлиқ кўрмадик. Ишонтириб айта оламанки, баъзи жойларда пойдевордан бошқа ҳеч нарса қолмаган”, деди у.
Кейт Пирсон уйлар худди машиналар каби кўтарилиб ағдарилгани, баъзилари эса юзлаб метрларга силжиганини қайд этди.
Аввалроқ “Милтон” тўфони сабабли АҚШда хавфнинг энг юқори даражаси эълон қилингани хабар берилганди.
Изоҳ (0)