“Берил” тўфони Техас штатида 3 миллионга яқин хонадонни электр энергиясиз қолдирди

АҚШнинг Техас штатида “Берил” тўфони оқибатида 2,7 миллион хонадон электр тармоғидан узилиб қолди. Бу ҳақда Reuters нашри хабар берди.

Манбада айтилишича, 8 июль куни Техас штатининг жануби-шарқида шиддатли шамол ва кучли ёғингарчилик кузатилган. Йирик магистралларни сув босган, нефть ташиладиган портлар фаолиятини тўхтатган.

Тўфон оқибатида ҳозирга қадар 3 киши ҳалок бўлган. 1300 дан ортиқ рейслар бекор қилинган. 2,7 миллиондан ортиқ хонадон электр ва сув тармоғидан узилиб қолган.

Ҳалокатли тўфон Техаснинг қирғоқ бўйидаги Матагорда ва Ҳьюстон шаҳарларига энг кўп зарар етказган. Иқлимнинг ноодатий ўзгариши туфайли “Берил” каби тўфонлар Луизиана ва Арканзас штатларида ҳам юз бериши мумкинлиги эълон қилинган.

“Берил” тўфони АҚШ соҳилларига етиб келишидан олдин Кариб ҳавзаси атрофидаги кўплаб мамлакатларга талафотлар келтирган. Қарийб бир ҳафта давомида Ямайка, Гренада, Сент-Винсент ва Гренадин ҳудудлари даҳшатли табиий офат билан курашган. Ушбу мамлакатларда 11 фуқаро ҳалок бўлгани хабар қилинган.

Техас штати бўйлаб фуқароларга 2500 дан ортиқ биринчи тиббий ёрдам кўрсатилган. Ўта хавфли ҳудудлардан фуқаролар кўчирилган. Тўфон яқинлашган ҳудудларда аҳолидан ўзбошимчалик билан уйларидан чиқиб кетмаслик сўралган.