АҚШ президенти Жо Байден Флорида штатига таъсир қилаётган кучли “Милтон” тўфони сабабли Германияга шу ҳафтага режалаштирилган ташрифини қолдирди.
Маълум қилиниша, бундан ташқари Байденнинг Германиядан кейин парвоз қилишни режалаштирган Анголага сафари ҳам кейинга қолдирилган. АҚШ етакчиси ушбу сафарларни қачон амалга ошириши ҳақида маълумот берилмаган.
Айни пайтда Германия ҳукумати вакили Штеффен Ҳебештрайт Байденнинг ташрифини кечиктириш қароридан афсусда эканини билдирган.
“Бироқ, федерал ҳукумат Флоридадаги вазиятни албатта тушунади”, дея қўшимча қилди у.
Ҳебештрейтнинг сўзларига кўра, Оқ уй қарори ҳақида аввалроқ Германия расмийларини хабардор қилган.
АҚШ президентининг ташрифи дастлаб 10—12 октябрь кунларига режалаштирилганди. Берлинда у Германия канцлери Олаф Шольц ва Германия федерал президенти Франк-Вальтер Штайнмайер билан учрашиши кутилаётган эди.
Шундан сўнг Байден Украинага ҳарбий ёрдам кўрсатиш бўйича коалициянинг навбатдаги йиғилиши бўлиб ўтиши керак бўлган Германия ғарбидаги Рамштейн авиабазасига ташриф буюриш ниятида бўлган.
Маълумотларга кўра, сўнгги соатларда “Милтон” тўфони бир оз заифлашган ва ҳозирда 4-тоифали бўронга айланган. Шамол тезлиги тахминан 230 км/соатни ташкил этмоқда. АҚШ Миллий довуллар маркази бу “Флорида қирғоқларига ёпириладиган ўта хавфли бўрон” эканлигини айтган.
Изоҳ (0)