Норвегия ҳукумати метеорологлар сўнгги 30 йилдаги энг кучлиси деб атаётган Ингунн тўфони яқинлашаётгани муносабати билан мамлакат аҳолисини уйларини тарк этмасликка ва эҳтиёткор бўлишга чақирди, дея хабар берди Associated Press.
Тўфон чоршанба куни Норвегиянинг марказий қисмидан ўтиб, пайшанба куни шимолга қараб ҳаракатланиши кутилмоқда. Қироллик расмийлари Трондхайм ҳудуди ва Лофотен ороллари учун “қизил” огоҳлантириш даражасини эълон қилди.
Норвегия полицияси қирғоқда тезлиги соатига 126-180 км бўлган шамоллар бўлишидан огоҳлантирди. Шунингдек, авиакомпаниялар рейсларда узилишлар бўлиши мумкинлигини маълум қилди.
Норвегия ороллари ўртасида алоқани таъминловчи баъзи паром операторлари аллақачон хизматларни тўхтатганини эълон қилган. Бундан ташқари, расмийлар мамлакатнинг тоғли ҳудудларида баъзи мактабларни ёпиш ва йўллар, туннеллар ва кўприкларни тўсиб қўйишни буюрди.
Изоҳ (0)