АҚШга тарихдаги энг даҳшатлиси бўлиши кутилаётган “Милтон” тўфони яқинлашмоқда. Тўфон баландлиги 4,5 метргача етадиган тўлқинларни юзага келтириши кутилмоқда, Флориданинг марказий ва жанубий аҳолиси хавф остида.
“Милтон” тўфони сўнгги 100 йилдаги энг кучли тўфонга айланиши мумкин. Флорида штати аҳолиси кенг миқёсда эвакуация қилинмоқда, деб хабар берди CNN телеканали.
5-тоифали “Милтон” тўфони Флорида қирғоқлари томон яқинлашмоқда. У 9 октябрь кечаси Тампа кўрфази ҳудудига урилиши кутилмоқда, деб ёзади WUSF.
Шамол тезлиги 257 км/соат бўлиб, бу сўнгги йиллардаги энг хавфли тўфонлардан бирига айланади. Штатнинг ғарбий қирғоқлари бўйлаб одамларнинг ҳаёти ва мол-мулкига катта хавф туғдирувчи 4,5 метргача бўлган тўлқинлар юзага келиши кутилмоқда. Тўфон ярим оролдан ўтгандан кейин шарқий қирғоқда ҳам сув тошқини кутилмоқда.
Флорида штатининг бир қанча ҳудудларида, жумладан Пинеллас округи ва Анна Мария оролида эвакуация ишлари олиб борилмоқда. Одамлар уйларини оммавий равишда тарк этишмоқда, магистрал йўлларда катта тирбандликлар мавжуд.
Расмийлар аҳолини огоҳлантиришларни эътиборсиз қолдирмасликка чақирмоқда, чунки тўфон, сувнинг кўтарилиши туфайли ҳалокатга олиб келиши мумкин, деб хабар беради Fox Weather.
CNN’нинг маълум қилишича, Флориданинг марказий ва жанубий қисмидаги уч миллиондан ортиқ аҳоли хавф остида.
Бу ҳудудда бир нечта торнадолар бўлиши мумкинлиги ҳам хабар қилинмоқда.
Изоҳ (0)