Индонезия Туркиянинг маҳаллий ишлаб чиқилган КААN бешинчи авлод қирувчиси учун илк хорижий харидор бўлиши мумкин. Журналист Хоқон Челикнинг айтишича, Анқара ва Жакарта 48 та самолёт бўйича қиймати 10 миллиард долларлик битимга жуда яқин турибди.
Агар мазкур даъво тасдиғини топса, туркларнинг маҳаллий дастури истиқболли лойиҳага айланади. Қолаверса, икки давлат ўртасидаги ҳарбий ҳамкорлик алоқалари вектори Kaplan танклари, Bayraktar дронларидан тортиб қирувчи самолётларга қадар кенгайиб, стратегик аҳамият касб этади.
Ҳозир Индонезия пойтахтида бўлиб турган Хоқон Челик икки давлат ўртасида тузиладиган шартнома мудофаа саноати тарихида энг йирик битимлардан бири эканини таъкидлади. Унга кўра, 48 та самолётни етказиб бериш учун 10 йиллик келишув имзоланади.
Журналист томонлар бу ҳақда бугун, 11 июнь куни бошланган Indo Defence халқаро кўргазмасида якуний қарорга келганини таъкидлади. Шунингдек, ҳужжатларни имзолаш маросими ҳам кўргазма доирасида ўтказилишини айтди.
“Туркия тарихидаги энг йирик келишувлардан бири имзоланишига соатлар қолди. Индонезия 48 та КААN қирувчисини харид қилади. 10 йиллик лойиҳа қиймати 10 миллиард доллардан ошади. Бу стол атрофида профессор доктор Ҳалук Горгун, Мудофаа саноати раиси ва Индонезия президенти ўтириб, шартномага имзо чекишади. Бу Туркия республикаси тарихида имзоланган энг йирик миқдордаги, энг аҳамиятли ҳарбий битимларидан биридир”, деган Хоқон Челик.
Индонезия ва КААN
Жакарта туркларнинг маҳаллий КААN лойиҳасига қўшилиши шу йилнинг апрель ойида маълум бўлди. Бироқ Хоқон Челикнинг даъвоси ҳозирча расмийлар томонидан тасдиқланмади. Аммо анчадан буён Туркиянинг мудофаа саноати билан чуқур ҳамкорик қилаётган давлат сифатида Индонезиядан бундай қадамни кутиш мумкин.
Анқара ва Жакарта аввал ҳам бир қанча лойиҳаларда ҳамкорлик қилган. Масалан FNSS ва PT Pindad компаниялари биргаликда Kaplan МТ (Ҳаримау) ўрта оғирликдаги танкини ишлаб чиқиб, Индонезия армиясига топширган.
2024 йил апрель ойида Туркияга расмий ташриф билан келган Индонезия президенти Прабово Субианто ҳам айни шу масалага тўхталган эди.
“Индонезия КААN 5-авлод қирувчи самолёти лойиҳасида иштирок этишни, шунингдек, MILDEN сувости кемаси лойиҳасида ҳам Туркия мудофаа саноати билан ҳамкорлик қилишни хоҳлайди. Бу имкониятдан фойдаланмоқчимиз”, деган эди у туркиялик ҳамкасби билан қўшма матбуот анжуманида.
КААB
ТAI ТF КААN турк ҳарбий саноати томонидан ишлаб чиқилган қирувчи бўлиб, ўзида бешинчи авлод самолётларига хос хусусиятларни мужассамлаштиргани айтилади. Бир неча функцияларни баравар бажара олиши, махсус аэродинамик тузилиш ва стелс қоплама шарофати билан радарларда сезилмаслик кабилар шулар жумласидан.
Қўшма Штатлар Туркияни F-35 дастуридан чиқариб юборгач, турклар ўз ишланмасига эътиборни кучайтирди. Дастлабки прототип синов парвозларини аллақачон муваффақиятли топширган. Покистон, Озарбайжон ҳамда Украина каби давлатлар эса дастурда иширок этишга қизиқиш билдирган.
Бироқ айрим экспертлар КААN қирувчисининг хусусиятлари бешинчи авлодга мансублигига шубҳа билан қарайди. Уларни айниқса двигатель билан боғлиқ баъзи саволлар ўйлантиради.
Изоҳ (0)