Time журнали 2021 йил бўйича дунёнинг энг нуфузли кишилари рейтингини эълон қилди. Ундан ҳозир колонияда жазо ўтаётган россиялик мухолифат етакчиси Алексей Навальний ҳам жой олган.
Рейтинг олтита тоифага бўлинди – «Кумирлар», «Пешқадамлар», «Гигантлар», «Санъат усталари», «Етакчилар» ва «Ихтирочилар», уларнинг ҳар бирига 11 дан 20 нафаргача киши киритилди.
Навальний «Кумирлар» тоифасидан жой олди, унга, шунингдек, Британия шаҳзодаси Гарри ва унинг рафиқаси Меган Маркл, теннисчи Наоми Осака, қўшиқчи Бритни Спирс ва япониялик бейсболчи Сёхей Отани ҳам киритилган.
Алексей Навальний «Новичок» моддасидан заҳарланиб, Берлинда даволаниб қайтгач, 17 январь куни Москванинг Шереметьево аэропортида ҳибсга олинганди. Февраль ойида Навальнийга «Ив Роше» иши бўйича тайинланган шартли жазо ҳақиқий ҳукм билан алмаштирилди. Мухолифатчи 2023 йилнинг августида колониядан озод қилиниши керак. Шу билан бирга, ҳозир Навальний яна учта жиноий ишда қатнашмоқда.
2017 йилнинг ёзида Time нашри Навальнийни интернетдаги энг нуфузли кишилар қаторига киритган. Ўшанда журнал Навальнийнинг рўйхатга киритилишини «унинг 1 миллион обуначига эга YouTube-канали Кремль ахборот блокадасини бузгани», шунингдек, «коррупцияга қарши оммавий норозилик намойишлари қўзғатгани» билан изоҳлаган.
«Гигантлар» орасида Apple бош директори Тим Кук, АҚШ гимнастикаси бўйича тўрт карра Олимпия чемпиони Симоне Байлз, Миллий футбол лигаси юлдузи Том Бреди, раперлар Timbaland ва Swizz Beats, АҚШнинг энг кўп унвонга эга енгил атлетикачиси Эллисон Феликс бор.
«Санъат усталари» тоифасига актрисалар Кейт Уинслет ва Скарлетт Йоханссон, рэперлар Lil Nas Х ва Bad Bunny, актёрлар Омар Си, Даниэль Калуя, шунингдек, энг яхши режиссёр номинацияси бўйича «Оскар» мукофотига сазовор бўлган биринчи осиёлик аёл Хлоя Чжао киритилган.
Бу йилги «Етакчилар» сафидан Жаҳон савдо ташкилоти (ЖСТ) раҳбари Нгози Оконжо-Ивеала, Эрон президенти Иброҳим Раисий, Италия ва Исроил бош вазирлари Марио Драги ва Нафтали Беннет, АҚШ Касалликларни назорат қилиш ва олдини олиш маркази раҳбари Рошел Валенски, Салвадор президенти Найиб Букеле ва Афғонистон бош вазири ўринбосари вазифасини бажарувчи Мулла Абдулғани Бародар сингари кишилар жой олди. Шунингдек, кетма-кет иккинчи йил ушбу тоифадаги рўйхатга Хитой Халқ Республикаси раиси Си Цзиньпин, АҚШ президенти Жо Байден, АҚШ собиқ президенти Дональд Трамп, Ҳиндистон бош вазири Нарендра Моди ва АҚШ вице-президенти Камала Харрис киритилди.
«Ихтирочилар» тоифасига SpaceX асосчиси Илон Маск, Nvidia бош директори Женсен Хуанг, General Motors бош директори Мери Барра ва канадалик дастурчи Виталик Бутерин киритилди.
Изоҳ (0)