Дунё бўйича COVID-19’ни юқтириб олганлар сони 147 238 543 кишига етди. Жонс Ҳопкинс университети маълумотлари шундан дарак бермоқда. Ушбу кўрсаткич бўйича АҚШ (32 миллион), Ҳиндистон (17,3 миллион), Бразилия (14,3 миллион), Франция (5,5 миллион) ва Россия (4,7 миллион) етакчилик қилмоқда.
Пандемия бошидан буён вирус оқибатида 3 110 245 киши вафот этган.
Исроилда коронавирусга қарши вакцина олган 5 миллиондан ортиқ аҳоли орасида юрак шамоллаши билан боғлиқ ўнлаб ҳолатлар кузатилди, бу асосан Pfizer компанияси препаратининг иккинчи дозасидан кейин қайд этилган.
«Соғлиқни сақлаш вазирлиги айни вақтда касалланиш ҳолатларининг меъёридан ошган-ошмаганини ва бу вакциналар билан боғлиқ бўлиши эҳтимолини текширмоқда», — деди Исроилда пандемияга қарши кураш бўйича дастурлар мувофиқлаштирувчиси Наҳмон Эш ва ҳозирча ҳеч қандай хулосага келинмаганини қўшимча қилди.
Унинг сўзларига кўра, кўпчилик ҳолатларда миокардит ҳолатлари 30 ёшгача бўлган одамлар орасида қайд этилган. Айни вақтда юрак хасталиги ва вакцинация ўртасидаги боғлиқликни аниқлаш қийин бўлади, чунки миокардитга турли вируслар сабаб бўлиши мумкин. Юрак шамоллаши ҳолатларининг худди шундай миқдори аввалги йилларда ҳам қайд этилган эди, деди Наҳмон Эш.
Pfizer компанияси ўз вакцинаси ҳақидаги маълумотларни текшириш учун Исроил Соғлиқни сақлаш вазирлиги билан доимий алоқада бўлиб турганини маълум қилди.
Эрон ўзининг коронавирусга қарши COVIRAN Breket маҳаллий вакцинасини серияли ишлаб чиқаришни бошлади.Коронавирус бўйича илмий кенгаш раҳбари Муҳаммад Мухбирнинг сўзларига кўра, сентябргача 30 миллион дозадан ортиқ Эрон вакцинаси ишлаб чиқарилади. «Вакцина Соғлиқни сақлаш вазирлигига топширилади, умумий эмлаш жараёни тезлаштирилади», — деди Мухбир.
Эрон COVIRAN Breket биринчи маҳаллий вакцинасини одамда илк марта 2020 йил 29 декабрда синаб кўрган, сўнг муваффақиятли натижалар ҳақида эълон қилган эди.
Таиландда COVID-19’га чалиниш бутун пандемия давридаги энг авж нуқтага етган бир пайтда пойтахт Бангкокда икки ҳафта муддатга бир қатор чекловлар киритилди.31 та турдаги жамоатчилик жойлари, хусусан, кинотеатрлар, парклар ва спорт заллари чекловлар таъсирига тушди. Савдо марказлари ва супермаркетлар энди қисқартирилган график бўйича ишлайди. 20 кишидан ортиқ одамнинг гуруҳ бўлиб тўпланиши мумкин эмас.
Шунингдек, мамлакатнинг 48 та провинциясида, шу жумладан, Бангкокда бино ичида ва ташқарисида ҳам ниқоб тақиш талаб этилади. Аммо мамлакатда умуммиллий локдаун, комендантлик соати ёки ҳаракатланиш учун тақиқ жорий қилингани йўқ.
Апрель бошидан буён Бангкокда COVID-19’билан касалланиш ҳолатлари кескин кўпайди. 1 майдан Таиланд айни пайтда коронавируснинг энг кучли тўлқинига дуч келган Ҳиднистондан келаётганлар шахсларни қабул қилишни тўхтатади (қироллик фуқароларидан ташқари).
Шунингдек:- Европа иттиқофи ёз ўрталарига келиб, COVID-19’га қарши жамоавий иммунитетга эришишга умид қилмоқда. Евроиттифоқ июль ўрталарига келиб, вояга етган аҳолида иммунитет пайдо бўлишига эришиш учун етарли бўлган миқдорда вакцина ишлаб чиқара олади, бунинг учун вояга етган аҳолининг 70 фоизи эмланган бўлиши керак.
- Италия қатъий локдаундан чиқмоқда. 26 апрель, душанба кунидан Италиянинг катта қисми коронавирус билан боғлиқ вазият бўйича «сариқ» ҳудудга ўтади, бу эса бу эса бир қатор карантин чекловларининг юмшатилишини билдиради. Бу ҳудудларда ресторан ва барлар қисман очилади, кинотеатр, театр ва музейлар ҳам баъзи чекловлар билан очилади.
- Нидерландия Ҳиндистонда коронавирус билан боғлиқ қийин вазият юзага келгани муносабати билан ушбу мамлакатдан барча йўловчи авиарейсларини тақиқлашга қарор қилди. Тақиқ 26 апрель куни 18:00 (маҳаллий вақт билан)да кучга кириб, 1 майгача давом этади.
Изоҳ (0)