Эрон Ғазо секторига ҳужум тўхтамаса, Ўрта Ер денгизини тўсиб қўйишини маълум қилди. Бу ҳақда эронлик генерал, Ислом инқилоби қўриқчилари корпуси бош қўмондони Муҳаммад Ризо Нағдийга таяниб, “ТАСС” хабар берди.
“Қўшма Штатлар ва иттифоқчиларининг Ғазо секторидаги жиноятлари давом этса, улар янги қаршилик кучлари пайдо бўлишини ва улар учун ҳамон фойдаланилаётган сув йўллари ёпилишини кўради. Кеча Форс кўрфази ва Ҳурмуз бўғози улар учун даҳшатли туш бўлган бўлса, бугун Қизил денгиз ва Боб ал-Мандеб бўғози, тез орада Ўрта Ер денгизи, Гибралтар ва бошқа сув йўлларининг ёпилишини кўради”, — деди у.
Нағдий Ўрта Ер денгизи блокадаси ким томонидан ва қандай ташкил этилиши мумкинлигига аниқлик киритмади. Эрон ва Яманнинг “Ансор Аллоҳ” (ҳусийлар) гуруҳи унга кириш имконига эга эмаслар.
Ғазо секторида Фаластин-Исроил можароси авж олганидан сўнг, ҳусийлар Исроилга ҳужумлар уюштириши ва операция ўтказилгунга қадар улар билан боғлиқ кемаларнинг Қизил денгиз ва Боб ал-Мандеб бўғози сувлари орқали ўтишига рухсат бермасликларини айтди.
Ноябрь ойи ўрталаридан бери Қизил денгиздаги бир қанча савдо ва ҳарбий кемалар Яманнинг “Ансор Аллоҳ” ҳаракати назорати остидаги ҳудудда ҳужумга учради. Бундан ташқари, ҳусийлар бортида 20 дан ортиқ экипаж аъзоси бўлган Galaxy Leader юк кемасини қўлга олди.
Ҳусийларнинг ҳаракатларига жавобан АҚШ расмийлари халқаро коалиция тузилгани ва Қизил денгизда навигация эркинлигини таъминлаш ва кемаларни ҳимоя қилиш бўйича операция тайёрланаётганини эълон қилди. Операция иштирокчилари орасида Баҳрайн, Буюк Британия, Испания, Италия, Канада, Нидерландия, Норвегия, Сейшел ороллари ва Франция бўлиши керак.
Шундан кейин Яман қуролли кучлари Қизил денгизни америкаликлар ва уларнинг иттифоқчилари учун “қабристонга айлантиришини” таъкидлади.
Изоҳ (0)