Ҳиндистонда 242 кишини олиб кетаётган йўловчи самолёт ҳалокатга учрагани ҳақида хабар берилган эди. Ўзбекистон Ташқи ишлар вазирлиги ҳодиса юзасидан маълумот берди.
Вазирлик берган маълумотга кўра, ҳалокатга учраган самолётда Ўзбекистон фуқаролари бўлмаган.
“Ҳиндистон ҳудудида юз берган самолёт ҳалокати ҳақидаги хабарни чуқур қайғу билан қабул қилдик. Ушбу фожиада ҳалок бўлганларнинг яқинлари ва оилаларига чуқур ҳамдардлигимизни изҳор этамиз.
Олинган дастлабки маълумотларга кўра, мазкур рейсда Ўзбекистон фуқаролари бўлмаган”, дейилади ТИВ муносабатида.
Ҳодиса ҳақида
Авиация парвозларини кузатиб борувчи Flightradar24 порталига кўра, ҳалокатга учраган самолёт Boeing 787-8 Dreamliner бўлиб, ушбу кейс бу моделдаги фуқаро лайнерлари билан юз берган илк ҳалокатдир. Дастлабки маълумотларга кўра, бортда бўлганларнинг 169 нафари Ҳиндистон, 53 нафари Буюк Британия, яна 7 киши эса Португалия фуқароларидир.
Самолёт тегишли бўлган Air India компанияси ҳолат юзасидан Х ижтимоий тармоғида баёнот бериб, тафсилотлар аниқлаштирилаётганини, қўшимча маълумот тез орада эълон қилинишини билдирди.
Маҳаллий манбалар хабарига кўра, ҳалокат самолёт аэропортдан учиб чиқаётган вақтда содир бўлган. Тармоқларда тарқалаётган видеода ҳаво лайнери қулашидан сониялар олдин баландлик йўқотганини кўриш мумкин.
Воқеадан кўп ўтмай, ҳалокат жойидан олинган кадрлар эълон қилинди. Унда ўт ўчирувчилар воқеа жойига етиб келиб, самолёт қолдиқлари ҳамда ён-атрофдаги автомобилларга туташган ёнғинни бартараф этаётганини кўриш мумкин. Air India самолёт шифохона биносига қулаганини маълум қилди. Ярадорлар шифохонага олиб кетилди.
Аҳмадобод аэропортининг маълум қилишича, самолёт маҳаллий вақт билан соат 13:39 да 23-сонли учиш-қўниш йўлагидан ҳавога кўтарилган. Шундан сўнг фавқулодда вазият ҳақида огоҳлантирувчи “Майдай” сигналини юборган. Бироқ орадан кўп ўтмай алоқа узилган.
Flightradar24 парвоз ҳақида охирги сигнал самолёт ҳавога кўтарилганидан атиги бир неча сония ўтиб олинганини маълум қилди. Шунингдек ҳаво кемаси ВТ-АНБ коди билан рўйхатга олинган Boeing 787-8 Dreamliner бўлганини тасдиқлади. Бироқ Boeing компанияси ҳозирча расмий изоҳ бермади.
Эслатиб ўтамиз, Ҳиндистонда сўнгги авиаҳалокат 2020 йили Air India Эхпресс билан юз берган эди. Ўшанда Air India’нинг арзон рейслар билан шуғулланувчи шўба корхонасига тегишли Boeing-737 самолёти қулаб, 21 кишини ҳаётдан олиб кетган эди.
Изоҳ (0)