Ҳиндистон Манипур штатининг айрим ҳудудларида комендантлик соати эълон қилиб, интернетни ўчириб қўйди. Бу ҳақда BBC хабар берди.
Бунга этник гуруҳ етакчиларининг ҳибсга олиниши оқибатида норозилик намойишлари бошлангани сабаб бўлган.
8 июнь куни полиция Меитеи қуролли радикал гуруҳи “Арамбаи Тенггол”нинг 5 нафар етакчисини, жумладан, уларнинг раҳбари Асем Канан Сингхни ҳибсга олган. Ҳиндистон тергов агентлиги Сингҳ Имфал аэропортида 2023 йилда штатда содир бўлган зўравонлик билан боғлиқ “турли жиноий ҳаракатлар”га алоқадорлиги учун ҳибсга олинганини билдирган.
Манипурда 2023 йилдан бери 2 йирик гуруҳ, Меитеи ва Куки ўртасида ер ва қудрат учун этник тўқнашувлар содир бўлиб келмоқда. Ушбу можарода 250 дан ортиқ одам ҳалок бўлиб, ўн минглаб одамлар кўчирилган.
“Арамбаи Тенггол” Меитеи гуруҳи томонидан қўллаб-қувватлангани боис давлатда катта таъсирга эга. Сўнгги кескинликлар тергов агентлиги Сингх ва “Арамбаи Тенггол”нинг яна 4 нафар раҳбарини ҳибсга олгач бошланган ва улар қўшни Ассам штатидаги Гувахати шаҳрига олиб кетилган.
Шундан сўнг, “Арамбаи Тенггол” аъзоларини озод қилишни талаб қилган намойишчилар полиция постига бостириб кирган. Автобусга ўт қўйиб, Имфалнинг баъзи ҳудудларида йўлларни тўсиб қўйган. Намойишчиларнинг бир қисми хавфсизлик ходимлари билан ҳам тўқнашгани таъкидланган. Хавфсизлик кучлари оломонни тарқатиш учун кўздан ёш оқизувчи газ снарядлари ва ўқлардан фойдаланган. Оқибатда 13 ёшли бола жароҳат олган.
Бу воқеалардан кейин ҳукумат штатнинг 5 та туманида интернетни 5 кунга тўхтатиб қўйган. 1 та штатда эса номаълум муддатга комендантлик соати жорий этилган. Шунингдек, баъзи жойларда 4 ва ундан ортиқ кишининг тўпланиши тақиқланган.
Изоҳ (0)