Ҳиндистоннинг Тамилнад штатида ҳарбий вертолёт ҳалокатга учради. Самолёт бортида 14 киши, жумладан, Ҳиндистон Қуролли кучлари мудофаа штаби бошлиғи генерал Бипин Рават ҳам бўлган. У ва яна 12 киши ҳалок бўлди, дея хабар берди «Коммерсантъ» Ҳиндистон ҳаво кучларига таяниб.
Генерал Нилгири-Хиллс тоғли ҳудуддаги ҳарбий коллежга йўл олганди, у ерда талабалар ва ўқитувчилар олдида нутқ сўзлаши керак эди. У билан бирга вертолётда рафиқаси, саккиз йўловчи ва тўрт нафар экипаж аъзоси бўлган. Ҳалокат сабаби номаълум.
«Чуқур афсус билан маълум қилинадики, генерал Бипин Рават, Мадхулика Рават (генералнинг рафиқаси) ва яна 11 киши ҳалок бўлгани аниқланди», — дейилади Ҳиндистон ҳаво кучлари Twitter’да. Яна бир киши жароҳат олиб, касалхонага ётқизилган, унинг аҳволи ҳақида ҳеч нарса айтилмаган.
Ҳиндистонда Мудофаа штаб бошлиғи лавозими 2019 йил декабрь ойида ташкил этилган. Рават бу лавозимга биринчи бўлиб тайинланган. Мудофаа штаби бошлиғи Ҳиндистон армиясининг барча бўлинмалари — қуруқликдаги кучлар, ҳаво кучлари ва денгиз флотининг ҳаракатларини мувофиқлаштиради.
3 декабрь куни Салвадорнинг қирғоқ зонасида бортида мамлакат мудофаа вазирининг ўғли Херардо Мерино бўлган ҳарбий самолёт ҳалокатга учраган эди. Кейинроқ Меринонинг жасади ва бортнинг бўлаклари топилган. Ҳодисада Меринонинг икки ҳамроҳи ҳам ҳалок бўлган.
8 сентябрь куни Россия Фавқулодда вазиятлар вазири Евгений Зиничев Красноярск ўлкасидаги Норилск шаҳридан 120 километр узоқликда жойлашган Лама кўлида ҳалок бўлганди. Ҳодиса «ўқув машғулотлари пайтида» содир бўлган. Зиничев режиссёр Александр Мелникни қутқаришга уринган. Зиничев билан «жарлик четида» турган Мелник сирғалиб сувга тушиб кетган. Мелник Норилскка Арктика ва Шимолий денгиз йўлининг ривожланишига бағишланган янги ҳужжатли лойиҳани суратга олишга тайёргарлик кўриш учун келганди. Зиничев билан бирга режиссёр ҳам ҳалок бўлган.
Изоҳ (0)