Бугун Тошкентда бошланган халқаро инвестисия форумида 3 мингдан зиёд делегат, шу жумладан, 100 га яқин давлатдан келган меҳмонлар иштирок этаётгани, юзлаб шартномалар ва келишувлар кутилаётгани ҳақида эшитиб ҳайратда қолдим. Шу ўринда ўз мулоҳазаларимни билдиргим келди.
Мен — зиёли инсонман, тарих фанидан дарс берганман, ҳозирда пенсиядаман. Болаларимни уйли-жойли қилдим, энди невараларим, эвараларим тарбияси ва ҳовлимдаги томорқам билан бандман. Қишлоқ хўжалиги маҳсулотлари етиштириб, ортиғини бозорга олиб чиқаман. Энди эса шу маҳсулотларимни европаликлар харид қилаётгани ҳақида эшитиб, янада ҳаяжонга тушдим. Келаси йил қишлоғимизга яқин жойда қайта ишлаш корхонаси қурилиши режалаштириляпти.
Аслида мен ишламасам ҳам бўлади, аммо бундай яхши пайтда уйда бекор ўтириш мумкинми? Ҳар бир янгиликни диққат билан кузатиб, мамлакатимиздаги тараққиётга ўз ҳиссамни қўшаётганимдан мамнунман.
Нега шундай деб ўйлаяпман? Чунки менинг ёшим, кўрган-кечирганларим, олдинги даврлар билан таққослашга имкон беради. Қишлоғимиз туман марказидан анча узоқда жойлашган. Ўн йиллар аввал электр тинимсиз ўчар, радио ҳар куни ишламасди. Бутун қишлоқ мамлакатимизда нима бўлаётганини, ҳукуматимиз қайси ишлар билан банд эканини билмасди. Дўстларимдан кўпчилиги “биз томонларга ҳам катта раҳбарларимиз келармикин” деган умид ва армон билан ўтиб кетишди.
Бироқ бугунги кун – мутлақо бошқача. Қишлоғимиздаги йўллар тузатилди, медпункт очилди, мактаб янгидан қурилди, телефон ва интернет келди. Энди шаҳарга бориш шарт эмас — аксинча, шаҳарликлар бизнинг томонларга дам олишга келишяпти.
Телевизор доимий ишлаяпти — бу биз учун энг катта хурсандчилик. Қишлоқ халқи дунёдаги янгиликларга қизиқади, гурунг қилишни яхши кўради. Куни кеча телевидениеда эшитдик: Тошкентга 3000 нафар меҳмон келаётган экан. Улар орасида дунёда тан олинган сиёсатчилар, сармоядорлар бор. Улар билан заводлар, электр станциялари, йўллар қуриш, агрокомплекслар ташкил этиш масалалари муҳокама қилинаётгани бизни ҳайратга солди.
Бу меҳмонлар Америка, Хитой, Франция, Саудия Арабистони, Ҳиндистон ва Япониядан келишяпти. Улар Президентимиз билан мулоқот қиляпти, биргаликда сармоя киритиш, янги ишлаб чиқариш корхоналари ташкил этиш ҳақида келишувлар имзолаяпти. Қуриладиган ишлаб чиқариш объектлари эса фақат экспорт учун эмас, ички бозор талабини ҳам қондиришга хизмат қилади.
Мен тарих фанидан дарс берган инсон сифатида кўп нарсани кўрганман. Лекин бундай кўламдаги ҳаракатлар, дунё давлатлари билан бундай даражада ҳамкорликни биринчи марта гувоҳи бўлмоқдаман. Бундай улкан тадбирларнинг ўтказилиши — юртимизда тинчлик, барқарорлик ва ишончли сармоя муҳити мавжудлигидан дарак беради.
Сармоядорлар бекорга келмайди. Уларга тинчлик, қонуний кафолатлар, ишончли муҳит керак. Шу жиҳатдан қараганда, бугунги Ўзбекистон дунёга очилган, муносиб шерик бўла оладиган мамлакатга айланди. Буни тан олиш керак.
Телевизорда кўриб қоламиз — қаерлардадир урушлар, ишсизлик, очлик… Шунда шукр қиламан: "Э, хайриятки, бизда тинчлик бор, раҳбаримиз омон бўлсин!" Президентимиз бошчилигида олиб борилаётган фаол сиёсат, сармоядорларга берилаётган кафолатлар бугунги муваффақиятлар заминидир.
Бундай форумлар дунё билан ҳамнафас юртимизнинг янги ривожланиш босқичидир. Телевизордан чиқиб, шундай чақириқ қилгим келади: "Келинглар, дўстлар, биргаликда ишлаймиз, фойда оламиз, уни янги мактаб, касалхона, университетларга йўналтирамиз. Бу ҳаёт — тинчлик ва барқарорлик асосида қурилади."
Мен ишонаман, давлатимиз раҳбари бошлаган ислоҳотлар нафақат биз, балки қўшни халқларга ҳам янги имкониятлар эшигини очади.
Миродил Эшмуродов
Изоҳ (0)