Россия ўзининг бешинчи авлод Су-57 кўринмас қирувчи самолётини Ҳиндистонда ишлаб чиқаришни таклиф этди. Бу ҳақда Россия ва Ҳиндистон расмийлари маълум қилди, деб ёзмоқда Al Arabiya нашри.
Бу Москванинг Нью-Деҳли билан мудофаа алоқаларини мустаҳкамлашга интилиши натижаси ҳисобланади.
Россия ўнлаб йиллар давомида дунёдаги энг йирик қурол импортчиси бўлган Ҳиндистоннинг асосий қурол етказиб берувчиси бўлиб келган ва унинг қирувчи самолётлари Ҳиндистон ҳарбий флотининг бир қисмини ташкил этади. Бироқ сўнгги йилларда Украинадаги уруш туфайли Москванинг экспорт имкониятлари чекланган бўлиб, Нью-Деҳли Ғарбга эътибор қаратишга мажбур бўлди, деб ёзади Al Arabiya нашри.
Россиянинг қурол экспортчиси Рособоронекспорт вакили журналистларга маълум қилишича, агар Ҳиндистон ҳукумати таклифни қабул қилса, қирувчи самолёт жорий йилдаёқ ишлаб чиқарилиши мумкин.
Ҳиндистон Мудофаа вазирлиги вазиятга изоҳ бериш ҳақидаги сўровга дарҳол жавоб бермади.
Россиялик саноат манбаси ва Ҳиндистон расмийси маълум қилишича, Россия Ҳиндистон ҳукумати ва давлат самолёт ишлаб чиқарувчиси Hindustan Аeronautics Ltd расмийлари билан музокаралар чоғида норасмий таклифни илгари сурган.
Бу қадам Ҳиндистон ҳарбий-ҳаво кучлари қирувчи эскадриляларини кучайтириш учун интилаётган бир пайтда амалга оширилди. Ҳозирда улар 42 та мақсадли кўрсаткичдан 31 тагача қисқарган, рақобатчи Хитой эса ўз ҳаво кучларини кенгайтирмоқда, дейилади хабарда.
Рособоронекспорт вакилига кўра, Ҳиндистонда технологияни тўлиқ ўтказиш билан самолёт ишлаб чиқариш ва унга хизмат кўрсатиш Ғарбнинг Россияга қарши санкцияларига таъсир қилмаслигини кафолатлайди.
У самолётни Ҳиндистоннинг Су-30 самолётларини ишлаб чиқариш линиясини такомиллаштириш орқали ишлаб чиқариш мумкинлигини айтди. Ҳозирда Ҳиндистон ҳаво кучлари паркида бундай турдаги 260 та самолёт мавжуд.
Су-57 америкалик муқобили билан рақобатлаша оладиган бешинчи авлод рус қирувчиси сифатида реклама қилинган бўлса-да, 2019 йилда ишлаб чиқишда кечикишларга дуч келди. Ишлаб чиқарувчининг сўзларига кўра, самолётни серияли ишлаб чиқариш 2022 йилда бошланган.
Изоҳ (0)