Украина президент офиси раҳбарининг маслаҳатчиси Михаил Подоляк Бирлашган Миллатлар Ташкилоти бош котиби Антониу Гутерришнинг дон келишуви бўйича Кремлга киритган “махфий таклифи” ҳақида Ғарб матбуотида тарқалган маълумотларга муносабат билдирди.
Подолякнинг сўзларига кўра, БМТ уруш тарғиботчиси ва Россияга кейинги ҳарбий ҳаракатларни давом эттиришга имкон бермоқда. Ташкилот қатор жиддий қонунбузарликларга қарамасдан, Россиянинг БМТдаги аъзолигини тўхтатиб қўйишдан бош тортмоқда.
Подоляк, шунингдек, бош котибнинг Россия ташқи ишлар вазири Сергей Лавров билан дон келишувини қайта тиклаш эвазига Россияга қарши санкцияларни кенг миқёсда олиб ташлаш бўйича “яширин музокаралари” ҳақида Ғарб ОАВда тарқалган хабарларга изоҳ берди.
“У очиқдан очиқ бутун дунёга Россия олдида тиз чўкишни таклиф қилмоқда”, — деб таъкидлади Подоляк.
Хабарларга кўра, БМТ раҳбари Россия Қишлоқ хўжалиги банкини SWIFT глобал молия тизимига қайтадан улашни, санкцияларни бекор қилишни, шунингдек, Россия маҳсулотлари учун Европа мамлакатлари портларини очиш, Россия учун оптимал хавф суғуртасини таъминлаш (кема суғуртаси), активларни блокдан чиқариш ва ҳоказоларни таклиф қилмоқда.
“Бу таклиф глобал дунё тартибини максимал камситиш ва ҳақоратлашдир. Яъни у моҳиятан БМТни бекор қилади. Ташкилот ёпилиб кетмаса-да, Россия томонида уруш тарғиботчиси сифатида ишлашда давом этади”, — деди Подоляк.
Унинг сўзларига кўра, Кремлга таклиф қилинган “олтин шартлар” Россияга жиддий босим ўтказиши керак бўлган кўплаб келишувларга зид. БМТ бош котибининг таклифи Россия учун барча “эшикларни” очади.
“Россия яна бир оз босим қилиш кераклигини тушунмоқда — бир неча ўнлаб, бир неча юзлаб Украина фуқароларини ўлдиряпти ва Гутерришга ўхшаган одамга босим ўтказяпти. Жаҳон ҳамжамияти Россия олдида тиз чўкмоқчи. Шунга кўра, биз Россияни бу урушдан имкон қадар катта йўқотишларсиз олиб чиқмоқчимиз. Шунда у қирғинлар, зўравонликлар, болаларни ўғирлаш, халқаро ҳуқуқни бузиш ва Украина бўйлаб вайрон қилинган фуқаролик инфратузилмаси учун жавобгарликдан қутулади”, — деб истеҳзо қилди Подоляк.
Зеленский офиси вакили Россия нафақат дон келишувидан чиққани, балки Украина инфратузилмасини намойишкорона йўқ қилаётганини таъкидлади. Подолякнинг фикрича, Россия аввало жаҳон бозоридаги рақобатчисини йўқ қилмоқчи.
“Иккинчидан, у давлат бюджетига катта даромад келтирувчи экспортга йўналтирилган асосий тармоқлардан бири бўлган саноатимизни йўқ қилмоқчи, учинчидан, Украинани ўрнини босмоқчи, яъни рақобатчисини йўқ қилиб, ўз маҳсулоти билан чиқмоқчи. Тўртинчидан, у қишлоқ хўжалиги ҳудудлари — Николаев, Херсон, Одесса, Запорожьени, транспорт ва логистика инфратузилмаси, портларни йўқ қилмоқчи”, — деди Подоляк.
У Россия Қора денгиз устидан тўлиқ назоратга эга экани, ўзи иштирок этмаган ҳар қандай бизнес фаолиятига тўсқинлик қилаётганини намойиш этаётганини таъкидлади.
“Яъни, Россия нафақат санкцияларни олиб ташлашни, балки саноат бозорини қайта тақсимлашни истайди. БМТнинг таклифлари ортига яширинган ҳолда, шундай қилишда давом этади”, — дейди маслаҳатчи.
Шу билан бирга, Подолякнинг айтишича, Украина Дунай портлари орқали, Хорватия, Руминия орқали ишлай олишини ва Туркиягача кемаларни қўриқлаб боришини кўрсатади. Қолаверса, Киев Қора денгиздаги ҳукмронлик учун ҳарбий-денгиз дронлар ёрдамида курашишга қодир.
Билд хабарига кўра, Антониу Гутерриш Лавров билан дон бўйича келишувни қайта тиклаш эвазига Россияга қарши санкцияларни кенг миқёсда олиб ташлаш бўйича музокаралар олиб бормоқда.
Изоҳ (0)