АҚШ президенти Дональд Трамп Россия раҳбари Владимир Путинга Украина урушини тугатиш учун иқтисодий рағбатлар таклиф қилишни кўзламоқда. The Telegraph нашрининг ёзишича, бу таклифлар Россияга ноёб ер элементлари ва қимматбаҳо табиий ресурсларга эга бўлиш имконини беради.
Маълум қилинишича, Трамп 15 август, жума куни Аляскада бўлиб ўтадиган учрашувга Путинга мўлжалланган бир қатор “пулли имкониятлар” билан келади. Уларга Алясканинг табиий бойликларидан фойдаланиш, Россия авиация саноатига қўйилган баъзи АҚШ санкцияларини бекор қилиш ҳам киради.
Асосий таклифлардан бири — Россия эгаллаб турган Украина ҳудудидаги ноёб ер бойликларини Путинга бериш. Украина дунё литий захираларининг қарийб 10 фоизига эга бўлиб, унинг йирик конлари айнан Россия қўл остидаги ҳудудларда жойлашган.
Маълум бўлишича, АҚШ молия вазири Скот Бессент президентга учрашув олдидан иқтисодий таклифларни тайёрлашда ёрдам бермоқда. Вашингтон, бу йўл билан, ўт очишни тўхтатиш келишувини тезлаштиришга умид қилмоқда.
Трамп учрашувдан сўнг Украина президенти Владимир Зеленский ҳам иштирок этадиган иккинчи учрашувни дарҳол ташкил қилишни режалаштираётганини айтган. Зеленский эса АҚШ раҳбари Украина учун хавфсизлик кафолатларини қўллаб-қувватлаганини билдирган.
Шунингдек, режаларга Россия самолётлари учун эҳтиёт қисмлар экспортига қўйилган тақиқларни юмшатиш, ҳамда Алясканинг Беринг бўғозига яқин ҳудудидаги катта нефть ва газ захираларидан Россиянинг фойдаланишига имкон бериш ҳам киритилган.
Бироқ Европа етакчилари бу рағбатлар “Путинга мукофот” сифатида кўринмаслиги кераклигини таъкидламоқда. АҚШ расмийлари эса учрашувни “тинглаш ва имкониятларни баҳолаш” босқичи сифатида кўрмоқда.
Изоҳ (0)