Россия Украинада уруш бошлаб, Европадаги мавжуд тинчлик тартибини издан чиқарди. Бу ҳақда Европа Иттифоқи кенгаши раиси Антониу Кошта Тиранадаги Европа сиёсий ҳамжамияти саммитининг ялпи мажлисида сўзлаган нутқида ма`лум қилган.
“Иккинчи жаҳон урушидан кейин, биз БМТ низоми, халқаро ҳуқуқ, савдо ва ҳамкорликни кенгайтиришга асосланган янги дунё тартибини шакллантирдик. Бу халқаро тартиб мукаммал бўлмаса-да, у тинчлик, айниқса Европада, ўсиб бораётган фаровонлик учун мустаҳкам пойдевор яратди. Бугун эса ушбу тартиб ҳар томонлама бузилмоқда”, дея таъкидлаган Антониу Кошта.
Унинг сўзларига кўра, Украинадаги уруш Европа қитъасига тўлақонли урушни қайтарган.
“Бу уруш бутун халқаро ҳамжамиятга, биз учун қадрли бўлган барча тамойилларга: миллий суверенитет, халқаро чегараларнинг дахлсизлиги ва ҳудудий яхлитликка қарши ҳужумдир”, деди у.
Евроиттифоқ раҳбари ўнлаб йиллар давомида халқаро савдо ва иқтисодий ҳамкорлик халқларни бирлаштирганини ҳамда ўзаро фаровонликка ҳисса қўшганини алоҳида таъкидлаган.
“Бугунги кунда эса бу ўзаро боғлиқлик ҳокимият ва босим воситасига айланиб бормоқда”, дея қўшимча қилди Евроиттифоқ раҳбари.
XXI асрда давом этаётган қуролли можаролар ҳақида сўз юритаркан, у Ғазо секторидаги вазиятга алоҳида эътибор қаратган.
Изоҳ (0)