“Уэнздей” сериали муаллифлари Аддамслар оиласи ҳақидаги анимацион фильм устида ишламоқда. Бу мутлақо янги ҳикоя ва машҳур сериал билан ҳеч қандай алоқаси бўлмайди.
“Уэнздей” сериали чиққанидан сўнг Аддамслар оиласининг ўзига хос услубини севиб томоша қилган бўлсангиз, унда сиз учун ажойиб янгилик бор. Сериал муаллифлари Альфред Гоф ва Майлз Миллар Амазон MGМ Studios учун Аддамслар ҳақида янги анимацион фильм устида ишламоқда. Бу Netflix’даги зийрак Уэнздей Аддамс ҳақидаги сериал билан боғлиқ эмас. Сериалда бош ролни “Эмми” ва “Олтин глобус” мукофотлари номинанти Женна Ортега ижро этган эди.
Гоф Crew Call подкастига берган интервьюсида шундай деди:
“Биз анимацион франшизани қайта ишга туширяпмиз. Бу мультфильм ъУэнздейъ сериалига боғлиқ бўлмайди. Ушбу анимация Аддамслар оиласи ҳақидаги мутлақо янги, тўлиқ метражли ҳикоя бўлади. Ҳозирча кўп нарса айтолмаймиз, чунки лойиҳа жуда эрта босқичда”.
Гофнинг сўзларига кўра, “Энг асосийси Уэнздейнинг дунёқарашини ифодалашдир. Ана шунда анимация мазмунли чиқади ва ҳақиқатан ҳам кулгили бўлади”.
“Уэнздей оддий детектив қиз эмас. У кимдир уни алдагани ёки ҳақиқат яширилгани учун терговга қўл уради. Уэнздей доимо заиф ҳолатдаги одамларни ҳимоя қилади”, деди Гоф.
Изоҳ (0)