Туркия президенти Ражаб Тоййиб Эрдўғон Сочидан қайтгач, Украинадаги вазиятни тинч йўл билан ҳал қилиш истиқболлари йўқлигини айтди. Бу ҳақда Аnkara Masasi хабар берди.
Эрдўғон конфликтнинг биринчи куниданоқ Туркия “тинчлик, мулоқот ва дипломатия” тарафдори бўлгани, “муаммони янада кучайтирмагани ва оловга мой сепмаганини” таъкидлади.
“Афсуски, 1,5 йилдан бери давом этаётган уруш ҳали ҳам давом этмоқда. Уфқда тинчликка эришиш истиқболи кўринмаяпти”, — дейди у.
Қора денгиз ташаббусининг активлашиши ҳақида гапирган Эрдўғон, Туркиянинг ҳиссаси натижасида БМТ ташаббуснинг жонланишига йўл очадиган янги пакет тайёрлаганини айтди.
“Туркия ташқи ишлар вазири Москвага ташрифи чоғида россиялик ҳамкасби Сергей Лавров билан ушбу ташаббуснинг техник жиҳатини, янги таклифлар пакетини гаплашди. Путин билан бу масалани муҳокама қилдим. Уни батафсил баҳоладим. Умид қиламанки, қисқа вақт ичида умидларни оқлайдиган яхши натижага эришамиз”, — деди у.
Бундан ташқари, Эрдўғон мамлакат Украинадаги можарони ҳал қилиш учун воситачилик хизматларини ўз зиммасига олишга тайёрлигини билдирди.
“Агар томонлар шундай истак билдирса, биз ўз ҳиссамизни қўшишга тайёрмиз. Шунингдек, маҳбуслар алмашинуви ва Запорожье атом электр станцияси каби масалаларда воситачилик ролини ўйнашда давом этамиз. Икки қўшнимиз ва минтақамизга зарар келтирувчи бу уруш имкон қадар тезроқ халқаро ҳуқуқ асосида адолатли ва мустаҳкам тинчлик ўрнатилиши билан якунланишига умид қиламиз”, — таъкидлади у.
Эрдўғоннинг айтишича, Россия раҳбарининг дон йўлаги келишувини янгилаш бўйича иккита аниқ илтимоси бор.
“Улардан бири Россия қишлоқ хўжалик банкининг SWIFT тизимига уланиши, иккинчиси эса дон ташишда фойдаланиладиган кемаларнинг суғуртаси”, — деди сиёсатчи.
Туркия президенти Путин 6 та давлатга дон жўнатиш масаласини кўриб чиқаётганини айтди.
Изоҳ (0)