Перу суди мамлакатнинг собиқ президенти Мартин Вискаррани пора олиш айблови бўйича 5 ойга қамоққа олишга ҳукм қилди. Бу ҳақда Al Jazeera хабар берди.
Маълум қилинишича, судья Хорхе Чавес 13 август куни бўлиб ўтган суд мажлисида Вискаррани қочиб кетиш хавфи борлигини айтиб, ҳибсга олиш қарорини чиқарган. У 11 йил аввал Мокуэгуа округи губернатори бўлиб ишлаганида пора олганликда айбланмоқда.
Вискарра айбловларни рад этиб, буни сиёсий таъқиб сифатида баҳоламоқда. У 2026 йилда президентликка қайта номзодини қўйишни режалаштираётган эди. Аён бўлишича, суд июнь ойида уни қамоққа олиш ҳақидаги биринчи сўровни рад этган, бироқ прокуратура бу қарорни апелляция қилиб, қочиб кетиш хавфини қайд этганди.
Вискарра сўнгги йилларда коррупция ва сиёсий инқирозлардан ларзага келган Перуда қамоққа олинган бешинчи собиқ президент бўлмоқда. Мамлакатда 2018 йилдан бери 6 марта президент алмашган. Ҳозирда 3 нафар бошқа собиқ президент — Алехандро Толедо, Олланта Ҳумала ва Педро Кастилё — Лима шаҳридаги собиқ давлат раҳбарлари учун мўлжалланган махсус қамоқхонада сақланмоқда. Парламент томонидан 2020 йилда лавозимидан четлатилган Вискарра ҳам шу ерга жойлаштирилиши режалаштирилган. Мазкур қамоқхона дастлаб 2009 йилда инсон ҳуқуқларини бузганлик учун 25 йилга қамалган собиқ президент Альберто Фухимори учун қурилган эди. У 2023 йилда халқаро суд қарорига зид равишда афв этилган, бир йил ўтиб эса саратон касаллигидан вафот этганди.
Изоҳ (0)