Мьянмада 28 март куни юз берган 7,7 ва 6,4 балли кучли зилзилалар оқибатида ҳалок бўлганлар сони 1700 кишига етди. Бу ҳақда Anadolu хабар берди.
Ер силкинишлари оқибатда жароҳатланганлар сони 3400 нафарни ташкил этмоқда. Мамлакат ҳарбий маъмурияти 300 киши ҳамон бедарак йўқолган деб ҳисобланаётганини маълум қилди.
Таиланд пойтахти Бангкокда эса қурбонлар сони 17 кишига етди. Жароҳатланганлар 32 кишини ташкил этмоқда, 83 киши бедарак йўқолган. Қутқарув хизматлари қидирув ишларини давом эттирмоқда. Таиланд табиий офатларнинг олдини олиш ва оқибатларини бартараф этиш агентлиги қўшни Мьянмада содир бўлган кучли зилзила оқибатида мамлакатда катта вайронагарчиликлар юзага келганини маълум қилди.
Жумладан, 420 та турар-жой биноси, 48 та ибодатхона, 76 та касалхона, шунингдек, ўнлаб мактаблар ва давлат муассасалари зарар кўрган. Қутқарув хизматлари етказилган зарарни баҳолаш ва тиклаш ишларини давом эттирмоқда.
Мьянма ва Таиланддан ташқари, зилзилалар Хитойнинг Юннан провинциясининг баъзи ҳудудларида вайронагарчиликларга олиб келди. Қурбонлар ва жабрланганлар ҳақида ҳозирча маълумот берилмаган. Мьянма ҳарбий маъмурияти зилзила муносабати билан халқаро ёрдам сўраганидан сўнг, мамлакатлар (Хитой, Россия ва Ҳиндистон ҳам) ёрдам кўрсатиш учун қутқарув гуруҳлари ва материалларни юбора бошлади.
БМТ Мьянмага зилзиладан кейин ёрдам кўрсатиш учун 5 миллион доллар ажратди. Зилзила шундоқ ҳам 20 миллион киши ёрдамга муҳтож бўлган Мьянмадаги гуманитар вазиятни янада оғирлаштиради.
Изоҳ (0)