Сурхондарё вилоятининг Жарқўрғон туманида 17 сентябрь куни автомобиль ва йўловчи поезди тўқнашиб кетди. Бу ҳақда Сурхондарё вилоят ИИБ ЙҲХБ ахборот хизмати раҳбари Элнур Абраев “Дарё”га маълум қилди.
Ҳолат Жарқўрғон туманида темирйўлнинг 9-пикетидаги кесишмасида содир бўлган.
“Ҳайдовчи А.Ў. ўзининг бошқарувида бўлган Nexia русумли автомашинаси билан темирйўлнинг 9-пикетидаги кесишмасидан ўтаётган вақтда автомашинанинг дивигатели ўчиб қолади. Натижада Сариосиё-Термиз йўналишида ҳаракатланиб келган йўловчи поезди билан тўқнашиб, йўл транспорт ҳодисасини содир этган”, — деди Элнур Абриев.
Гувоҳлардан бирининг “Дарё”га маълум қилишича, тўқнашув вақтида машинадан газ сизиб чиққан.
“Ҳамма ўзини четга олди. Ана портлаб кетади, мана портлаб кетади деб турган жойимизда ички ишлар ва темирйўлчи ходимлар чопиб келиб, беҳуш ётган ҳайдовчини машинадан олиб чиқишди”, – деди гувоҳ.
Маълум бўлишича, ҳушсиз ётган йўловчига темирйўл ходими Музаффар Алияров ҳамда ички ишлар ходими, сержант Ғайрат Саъдуллаев ёрдам берган.
“Поезд экстрний тормозлаганидан сўнг, чанг ичида автомашина ағдарилиб ётганини кўрган. Автомашинада газ чиқаётгани боис фуқаролар яқинига бормаган. Шу пайт иккала ходим бориб, газни ўчириб, автомашина салони ичидаги ҳайдовчини чиқариб олган”, – дейилади ИИБ маълумотида.
Қўшимча қилинишича, ҳайдовчи олган енгил тан жароҳати билан туман касалхонасига мурожаат қилган. Ҳозирда фуқаронинг соғлиги барқарор.
Аввалроқ Сурхондарёда Cobalt ва Lacetti ҳайдовчилари йўл талашиб жарликка қулаб тушган ҳолати бўйича маълумот берилган эди.
Изоҳ (0)