Қўстанай вилоятининг Олмаота—Екатеринбург трассасида 20 май куни микроавтобус юк машинаси билан тўқнашди. Ҳодиса оқибатида олти киши ҳалок бўлди. Бу ҳақда вилоят ички ишлар бошқармаси хабар берди.
Ҳодиса “Қайроқ” чегара постидан икки километр узоқликда юз берган. Ford Transit микроавтобуси 10 нафар йўловчини олиб кетаётган бўлган. Ҳодиса оқибатида олти киши воқеа жойида ҳалок бўлган. Улар қайси давлат фуқаролари экани ҳақида маълумот берилмаган.
Беш киши турли тан жароҳатлари билан Қорабалиқ туман касалхонасига етказилган. ЙТҲ юзасидан Қозоғистон Жиноят кодексининг 345-моддаси 4-қисми (икки ёки ундан ортиқ шахснинг ўлимига сабаб бўлган транспорт воситалари ҳаракати ёки улардан фойдаланиш қоидаларини бузиш) билан жиноят иши қўзғатилиб, тергов ҳаракатлари олиб борилмоқда. Ҳодиса жойида тергов-тезкор гуруҳи ишламоқда.
Март ойида Қозоғистонда 33 нафар ўзбекистонлик бўлган автобус ЙТҲга учраган эди. Ҳодиса 2 мартга ўтар кечаси Самара—Чимкент трассасида юз берган. Йўловчи автобусига юк машинаси келиб урилган. Автобус Уфадан Самарқанд шаҳрига кетаётган бўлган. ЙТҲ оқибатида ҳеч ким жабрланмаган.
Изоҳ (0)