Сурхондарё вилояти Денов туманида содир бўлган йўл-транспорт ҳодисаси оқибатида икки киши ҳалок бўлди. Бу ҳақда вилояти ИИБ Йўл ҳаракати хавфсизлиги бошқармаси хабар берди.
Маълум қилинишича, 19 январь соат 20:00 лар чамасида Денов тумани “Водий” маҳалласи ҳудудидан ўтувчи 4R-108V автомобиль йўлининг 3-километрида 51 ёшли ҳайдовчи Nexia автомашинасини бошқариб келиб, йўлни кесиб ўтаётган пиёдани уриб юборган. Шунингдек, у бошқарувни йўқотиши натижасида қарама-қарши йўналишдан келаётган Сурхондарё вилояти ИИБ хўжалик бўлимига тегишли “GAZon Next” махсус транспорт воситасининг йўналишига чиқиб кетиб, тўқнашув содир этган.
ЙТҲ натижасида Nexia русумли автомашина туртиб кетган 42 ёшли пиёда оғир тан жароҳатлари билан шифохонага ётқизилган. Ҳодиса оқибатида эса Nexia ҳайдовчиси ва бир нафар йўловчи шифохонада вафот этган.
Ҳозирда ҳолат юзасидан Денов туман прокуратураси томонидан тергов ҳаракатлари олиб борилмоқда.
Аввалроқ Андижон вилояти Шаҳрихон туманида Cobalt машинаси ёниб кетгани, Андижонда йўл четида турган Nexia’да ёнғин чиққани, Қамчиқ довонида лак-бўёқ ортилган юк машинаси ёниб кетиши оқибатида бир неча киши жабрлангани тўғрисида хабар берилганди. Шунингдек, Қашқадарёда Damas билан тўқнашган Captiva ёниб кетганди.
Изоҳ (0)