Андижонда Cobalt, Damas ва “Москвич” иштирокидаги ЙТҲда икки ҳайдовчи ҳалок бўлди (видео)

Андижон вилояти ИИБ Йўл ҳаракати хавфсизлиги бошқармаси Хўжаобод туманида содир бўлган йўл-транспорт ҳодисаси юзасидан маълумот берди.

Қайд этилишича, 4 апрель куни соат 15:30 ларда Хўжаобод тумани “Мустақилликнинг 27 йиллиги” МФЙ ҳудудидан ўтган Гулистон—Бўка—Ангрен—Қўқон ва Андижон орқали Ош автомобиль йўлида йўл-транспорт ҳодисаси содир бўлган. 22 ёшли Cobalt ҳайдовчиси автомашинани бошқариб кетаётиб, қувиб ўтиш қоидасини бузган ва йўлнинг қарама-қарши томонига ўтган вақтида, ўз йўналишида қаршисидан келаётган 33 ёшли А.Б. бошқарувидаги Damas билан тўқнашиб кетган.

Damas автомашинаси тўқнашув натижасида бошқарувни йўқотган ва ўзи билан бир йўналишда ёнма-ён келаётган 34 ёшли Н.Х. бошқарувидаги “Москвич-412” русумли автомашинасига бориб урилган.

ЙТҲ оқибатида Cobalt автомашинаси ҳайдовчи А.Г. “Бош чаноқ суягининг ёпиқ синиши, кўкрак қафасининг эзилиши”, Damas автомашинаси ҳайдовчиси Б.А. “Бош чаноқ суягининг ҳамда ўнг елка ва ўмров суякларининг ёпиқ синиши”, Damas автомашинаси ичида бўлган 29 ёшли йўловчи А.О. “Чап оёқ болдир суягининг ёпиқ синиши” ташхиси билан Республика шошилинч тез тиббий ёрдам марказига ётқизилган. Кўрсатилган муолажаларга қарамай Cobalt ва Damas ҳайдовчилари шифохонада вафот этган.

Ҳолат юзасидан, Хўжаобод тумани ИИБ Тергов бўлинмаси ходимлари томонидан терговга қадар суриштирув ишлари олиб борилмоқда.

Куни кеча Тошкентда юк машинаси ва 14 та автомобиль иштирокида ЙТҲ содир бўлганди.