Andijon viloyati Shahrixon tumanida haydovchining rulda chalg‘ib qolishi oqibatida 6 ta mashina to‘qnashdi. Bu haqda viloyat YHXB xabar berdi.
Ma’lum qilinishicha, holat 3-iyun kuni soat 16:30 larda, Shahrixon tumani “Begbachcha” MFY hududidan o‘tgan A-373 xalqaro avtomobil yo‘lining 415-kilometrida sodir bo‘lgan.
Toshkent-Andijon yo‘nalishi bo‘yicha harakatlanib ketayotgan 2 ta Lacetti, 2 ta Cobalt, Nexia-3 haydovchilari svetoforning taqiqlovchi ishorasida to‘xtab turgan vaqtlarida ularning orqasidan oraliq masofani saqlamasdan harakatlanib kelgan Hundai haydovchisi rulda chalg‘ib qolishi oqibatida to‘qnashuv sodir etgan.
To‘qnashuv oqibatida barcha transport vositalari texnik shikastlangan, tan jarohati olgan fuqarolar yo‘q.
Mazkur holat yuzasidan Shahrixon tumani ichki ishlar xodimlari tomonidan surishtiruv ishlari olib borilmoqda.
25-may kuni Namanganda Nexia-3 YTHga uchrab, haydovchisi bilan birga yonib ketgandi. Farg‘onada Nexia haydovchisi bosib ketgan velosipeddagi 12 yoshli bola vafot etdi. Haydovchi uch yil muddatga barcha turdagi transport vositalarini boshqarish huquqidan mahrum qilinib, 5 yilga ozodlikdan mahrum etildi. 10-mayda Toshkent viloyati Bekobod tumanida Damas “peshexod”dan o‘tayotgan piyodani bosib ketdi.
YTHlar statistikasi
O‘zbekistonda 2025-yilning dastlabki uch oyida YTH sodir etishi oqibatida 891 nafar shaxs sudlandi.
2024-yil davomida Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan 3 321 nafar shaxs sudlangan. Ularning 917 nafariga ozodlikdan mahrum qilish jazosi, 2 404 nafariga esa ozodlikdan mahrum qilish bilan bog‘liq bo‘lmagan jazolar tayinlangan.
2025-yilning I choragi mobaynida ushbu modda bilan 891 nafar shaxs sudlanib, ularning 173 nafariga ozodlikdan mahrum qilish jazosi tayinlangan.
Shuningdek, 718 nafar fuqaroga ozodlikdan mahrum qilish bilan bog‘liq bo‘lmagan jazolar tayinlandi.
Izoh (0)