Германияда етарли миқдорда кўнгиллиларни жалб этиш имкони бўлмаса, 2026 йилдан мажбурий ҳарбий хизматга қайтилади. Бу ҳақда мамлакат мудофаа вазири Борис Писториус маълум қилди.
Бизнинг моделимиз дастлаб ихтиёрий иштирокка асосланган. Агар бизда ихтиёрий аризалардан кўра кўпроқ бўш ўринлар пайдо бўладиган вақт келса, шунда мажбурий хизматни жорий этиш тўғрисида қарор қабул қилишимиз мумкин, дея изоҳ берди у.
Вазир тегишли қонун лойиҳаси келгуси йилнинг 1 январидан кучга кириши мумкинлигини таъкидлади. Германия армиясида мажбурий ҳарбий хизмат 2011 йилда фақат тинчлик даври учун бекор қилинган эди. Айни пайтда ҳарбий хизматчилар танқислиги — тахминан, 100 минг кишилик етишмовчилик сабабли мамлакатда яна ҳарбий чақирувни қайта жорий этиш масаласи кўтарилмоқда.
Писториуснинг сўзларига кўра, яқин 2,5 йил ичида фақат қўшимча ҳарбийлар ҳисобига керакли миқдордаги одамларни тўплашнинг иложи йўқ.
Бунинг учун захиранинг бир қисмини тиклашимиз керак. Бизда 800 мингга яқин захирадаги аскар бор, улардан 60 минг нафари хизматга тайёр, деди вазир.
Захирага “қизиқиш билдирган” яна 150 минггача одамни сафарбар қилиш мумкин. Вазирнинг ҳисоб-китобига кўра, фаол шахсий таркиб, захирадагилар ва қайта чақирилиши мумкин бўлганларни қўшиб ҳисоблаганда, умумий куч 460 минг кишини ташкил этади.
Писториус 2024 йил Германияда ҳарбий мажбурият қайтарилмаслигини, бунинг ўрнига мамлакатда ёшларни ихтиёрий равишда армияга жалб қилишга асосланган хизмат модели жорий этилишини айтганди. Ўша пайтда ҳали канцлер бўлмаган Фридрих Мерс ҳам хизматни ихтиёрий асосда ривожлантириш ниятида эканини айтган. Лавозимга киришгач, у мамлакат қуролли кучларини Европанинг энг кучли армиясига айлантиришни ўз ҳукуматининг устувор вазифаси деб атади.
Бундай режалар Ғарб сиёсатчиларининг 2029 йилгача урушга тайёргарлик кўриш ҳақидаги чақириқлари фонида янграмоқда. Россия президенти Владимир Путин НАТО давлатларига эҳтимолий ҳужум ҳақидаги баёнотларни “васваса” деб атаганди.
Изоҳ (0)