Оқ Уй 2016-молиявий йил учун 4 триллион долларлик АҚШ давлат бюджети лойиҳасини тақдим этди, деб хабар бермоқда «Вести Экономика». Бундан 561 миллиард доллари ҳарбий эҳтиёжлар учун ажратилган. Шу аснода, эътиборингизга дунёдаги ҳарбий бюджети энг катта бўлган 10 мамлакатни ҳавола этамиз.
10. Жанубий Корея: 33,9 миллиард доллар
Жанубий Корея ўз ҳарбий бюджетини Хитой ва Япония ҳарбий харажатлари ошишига қараб, шунингдек Шимолий Корея томонидан доимий таҳдид туфайли ошириб боради. Катта бўлмаган мамлакатнинг ҳарбий хизматчилари умумий сони 640 минг кишини, захира таркиби эса 2,9 миллион кишини ташкил этади.
9. Ҳиндистон: 47,4 миллиард доллар
Ҳарбий маҳсулотлар импорти бўйича дунёда биринчи ўринда турадиган Ҳиндистон армияси модернизацияси учун катта маблағлар кераклиги туфайли мудофаа харажатлари янада ошиши кутилмоқда. Ҳиндистон арсеналидаги баллистик ракеталар Покистоннинг исталган еридаги ва Хитой ҳудудининг катта қисмидаги мўлжални уришга қодир. Армия хизматчилари 1,33 миллион киши, захирадагилар яна 2,14 миллион кишини ташкил этади.
8. Япония: 48,6 миллиард доллар
Конституцияга биноан ҳужумкор армияга эга бўлмаган Япония Хитой билан ҳудудий можаролар кўпайгани сари ҳарбий бюджетини ҳам ошириб бормоқда. Техника ва қурол билан таъминланган қуролли кучларда 247 минг киши хизмат қилади, 57,9 минг киши эса захирада.
7. Германия: 48,8 миллиар доллар
Иккинчи Жаҳон урушидан кейин аҳолиси асосан аксилҳарбий кайфиятга эга бўлган Германия дастлаб фақат мудофаа кучлари билан чекланган бўлса ҳам, Югославия тарқалиб кетгач халқаро операцияларда ҳам фаол қатнаша бошлади. Ҳарбий хизматчилар сони 183 минг кишини, захира 145 минг кишини ташкил этади. Профессионал армия ташкил этиш мақсадида 2011 йилда мажбурий ҳарбий хизмат тугатилган.
6. Буюк Британия: 57,9 миллиард доллар
2018 йилгача қуролли кучлари сонини 20 фоизга қисқартиришни режалаштираётган Буюк Британия армиясида ҳозирда 205,3 минг киши хизмат қилади, яна 188 минг киши эса захирада. Ҳарбий бюджет камайишига қарамай, армиядаги техникалари эвазига кўп давлатлардан устунликни сақлаб қолиши айтилмоқда.
5. Франция: 61,2 миллиард доллар
Франция Марказий Африка Республикаси, Чад, Мали, Сенегал каби давлатлардаги ҳарбий операцияларда фаол иширок этади. Янги ҳарбий бюджет яна кўплаб ҳарбий техникаларни сотиб олишни кўзда тутади.
4. Саудия Арабистони: 67 миллиард доллар
Саудия Арабистонининг ҳарбий бюджети 2006 йилдаги 31 миллиард доллардан 2013 йилда 67 миллиард долларга етди. Ар-Риёд АҚШдан қурол-яроғларнинг улкан партияларини сотиб олмоқда. F-15 қирувчи самолётлари жамланмаси шулар жумласидандир.
3. Россия: 87,8 миллиард доллар
Россия ҳарбий хизматчилари сони 766 минг кишини, захира эса 2,5 миллионга яқин кишини ташкил этади. Дунёдаги энг йирик танк кучлари айнан Москвага тегишли: 15,5 минг танк Россия армияси арсеналида мавжуд.
2. Хитой: 188 миллиард доллар
2,285 миллионлик армия ва яна 2,3 миллионлик захирага эга Хитой саноат ва ҳарбий жосуслик орқали хорижий ҳарбий техника муқобилларига эга бўлиб бораётгани қайд этилган.
1. АҚШ: 561 миллиард доллар
Сўнгги йилларда ҳарбий бюджетини қисқартираётган АҚШнинг армияси учун харажатлари ўзидан кейин турувчи 10 давлатнинг ҳарбий бюджети қўшиб ҳисобланган кўрсаткичдан ҳам катта. Ҳарбийларнинг умумий сони 1,43 миллион киши, захира эса 850 минг кишидан иборат. Шунингдек, Вашингтон самолёт ташувчи 19 кемадан иборат флотга ҳам эга.
Изоҳ (0)