Россия ташқи ишлар вазири Сергей Лавров Германиянинг янги канцлери Фридрих Мерцни ҳозирги шароитда Германия Европага етакчилик қилиши кераклиги ҳақидаги баёноти учун сурбет деб атади. Бу ҳақда ТАСС хабар берди.
“Брюсселдаги барча амалдорлар Украина масаласида ўз нуқтаи назарларини ҳимоя қилиб, сайловчиларини белни маҳкам боғлаб, яхши кунларни кутиш кераклигига ишонтиришмоқда. Чунки ҳозир Украинага ёрдам бериш керак, соғлиқни сақлаш ва иситиш муаммолари иккинчи ўринга сурилиши лозимлигини айтишмоқда. ‘Кутиш керак, чунки Украина Европа қадриятларини ҳимоя қилмоқда’, дейишади. Европа ўз қадриятларини нимада кўраётгани ҳақида ўзингиз хулоса чиқаринг.
Ҳақиқий натсизм қайта жонланмоқда. Бунга кўплаб мисоллар бор. Жумладан, ГФРнинг янги канцлери жаноб Мерцнинг Германия яна Европага раҳбарлик қилиш вақти келгани ҳақидаги нутқи. Бундай сўзларни айтиш учун сурбет одам бўлиш керак”, деди Лавров.
Бундан олдин Германия бундестагининг мудофаа қўмитаси раиси Мари-Агнес Штрак-Симмерманн Россия президенти Владимир Путинни Украинани Россия империяси таркибига қўшиб олишни истаётганликда айблаган эди.
Германиянинг янги канцлери Фридрих Мерц янги ҳукуматнинг парламентдаги илк баёнотида Россия Федерацияси ва Украина ўртасидаги инқирозни ҳал этиш учун қабул қилинадиган қарорлар янада пухта ўйланиши лозимлигини, вазиятнинг натижаси бутун қитъадаги дунё тартибига таъсир кўрсатишини билдирганди.
Изоҳ (0)