«Дарё» нашри 26 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Путин йирик ядровий зарбага қарши жавоб «машғулотлари»ни ўтказди
Россия президенти Владимир Путин бошчилигида душманнинг ядровий зарбасига жавобан ядро зарбаси бериш бўйича ўқув машғулотлари ўтказилди, деб ёзади «РБК». Кремль қуруқлик, денгиз ва ҳаво стратегик тўхтатувчи кучлар иштирокидаги машғулотлар якунланганини маълум қилди. Унинг давомида Камчаткадаги Кура полигонида «Ярс» ва «Синева» баллистик ракеталари учирилди.
Путин Россия мудофаа вазири Шойгу ва Бош штаб бошлиғи Герасимовнинг стратегик тўхтатувчи кучларни тайёрлаш бўйича ҳисоботларини тинглади. Шойгу машғулотлардан мақсад — жавоб берувчи йирик ядровий зарбани ишлаб чиқиш эканини таъкидлади.
«Украина Қримни, албатта, озод қилади» — Владимир Зеленский
Украина ноқонуний равишда аннексия қилинган Қрим устидан суверенитетини, албатта, қайта тиклайди. Бу ҳақда Украина президенти Владимир Зеленский ватандошларига видеомурожаатида айтди. «Биз Қримни, албатта, озод қиламиз. Мамлакатимизнинг ушбу бўлагини нафақат умумукраина, балки умумевропа заминига қайтарамиз», — деди Зеленский.
Унинг сўзларига кўра, Украина ғалабаси туфайли Украинада қанчалик тез тинчликка эришилса, Россия бошқа минтақаларга, жумладан, Эрон билан ҳамкорликда Яқин Шарққа шунча кам «ёвузлик сочишга улгуради». Давлат раҳбари, шунингдек, 25 октябрь куни Украинага ташриф буюрган Германия президенти билан музокаралар ўтказганини айтди.
«Биз Германиядан тақдим этилган замонавий ва самарали ҳаво ҳужумидан мудофаа тизими учун жуда миннатдормиз. Худди шундай янги тизимларни кутяпмиз», — деди Украина раҳбари.Айни пайтда АҚШ Украинага биринчи NASAMS зенит-ракета комплексларини топширди
Ушбу комплекс мавжуд ва яқинлашаётган душман самолётлари, дронлари ва қанотли ракета таҳдидларини аниқлаш, уриш ва йўқ қилиш қобилиятини максимал даражада оширади
Туркманистон Каспий денгизи бўйида ҳарбий ўқув машқларини ўтказди
Туркманистон президенти Сердар Бердимуҳамедов 24 октябрь куни Болқон вилоятидаги Денгиз ўқув-машқ марказида бўлиб ўтган ҳарбий машғулотларни кузатди, деб хабар бермоқда «Хроника Туркменистана».
Туркманбошида шаҳридаги аэропортда давлат раҳбари қирувчи, жанговар ва юк ташувчи самолётларни кўздан кечирган. Сўнг у ердан вертолётда ҳарбий-дала машғулотлари ўтказилаётган жойга етиб олган.
Мудофаа вазири Бегенч Гундогдиев пиёда қўшинлар, ҳарбий-ҳаво кучлари, ҳаво ҳужумига қарши мудофаа қўшинлари ва ҳарбий-денгиз кучлари шайлиги ҳақида ҳисобот берган.
Машқлар чоғида ҳарбийлар ерга ва кемаларга ўрнатилган ҳаво ҳужумига қарши мудофаа тизимлари ёрдамида ҳаводаги нишонларни урди, Туркияда ишлаб чиқарилган Bayraktar учувчисиз учар қурилмаси, шунингдек, винтли ҳужумчи самолётлар ва реактив самолётлар ердаги шартли душман объектларига зарбалар берди.
Тайванда ҳарбий хизматчилар маоши оширилади, мажбурий хизмат муддати ҳам узайиши мумкин
Тайван ҳарбий хизматчиларнинг ойлик маошини икки баравар ошириб, камида 15 000 Тайван долларига (465 доллар) чиқармоқчи. Бу ҳақда South China Morning Post хабар берди.Орол расмийлари Пекин билан кескинлик шароитида мажбурий ҳарбий хизматни тўрт ойдан бир йилгача узайтириш режасини кўриб чиқмоқда.
Аввалроқ Хитой етакчиси Си Цзиньпин Хитой Тайван билан тинч йўл орқали бирлашишга интилаётгани, бироқ куч ишлатишдан воз кечишга ваъда бериш ниятида эмаслигини маълум қилган. Тайван эса ҳеч қачон ўз суверенитети, эркинлиги ва демократик қадриятларга содиқлиги билан боғлиқ масалаларда ён бермаслигини билдирган.
Россия қамоқхоналаридаги ватандошларимиз урушга юборилишига томошабин бўлиб турмаслик зарур» — иқтисодчи Отабек Бакиров Ўзбекистон расмийларига мурожаат қилди
«Новая газета. Европа» нашри Россия таркибига кирувчи Мордовиядаги колониядан «Вагнер» ёлланма жангчилари таркибида Украинадаги жанговар зонага жўнатилган маҳбуслар шахсини аниқлагани хабар қилинганди. Қамоқхонадан жами юздан ортиқ киши фронтга юборилган бўлиб, уларнинг ярми Ўзбекистон, Тожикистон, Молдова, Сербия ва Миср шунингдек, Украина фуқаролари экани келтирилган.
Иқтисодчи Отабек Бакиров мазкур хабар юзасидан Ўзбекистон расмийларига мурожаат қилиб, ўзбекистонликларнинг урушга юборилишига томошабин бўлиб турмасликка чақирди.
Ўзбекистон расмийлари қамоқхоналардаги маҳбус ватандошларимизнинг урушга юборилишига четдан томошабин бўлиб турмаслиги зарур. Чунки маҳбусларда афсуски танлов бўлмайди, уларни босим остида мажбурлаш ҳам шарт эмас. Кимдир маҳбус-ку, жазога лойиқ деб қўл силташи, кўз юмиши мумкин.Лекин улар ҳам ҳақ-ҳуқуқларга эга, қолаверса ватандошларимиз. Адашмасам, Ўзбекистон ва Россия ўртасида маҳбусларни алмашиш бўйича битим мавжуд. Бир неча йил аввал Россия қамоқхоналарида 7 минг ўзбекистонлик маҳбус борлиги айтиларди. Бу кичик рақам эмас, ҳар бири алоҳида тақдир, алоҳида фожиа», — деган иқтисодчи Отабек Бакиров
Изоҳ (0)