Покистонда худкуш террорчи 21 май куни мактаб автобусини портлаб юборди. Оқибатда камида тўрт бола ҳалок бўлди, 30 дан ортиғи жароҳатланди. Бу ҳақда ABC News хабар берди.
Ҳужум Балужистон вилоятининг Хуздар туманида юз берган. Ҳодиса автобус болаларни шаҳардаги мактабга олиб кетаётган пайтда содир бўлган. Ҳеч бир гуруҳ ҳужум учун масъулиятни дарҳол ўз зиммасига олмаган.
Покистон ички ишлар вазири Моҳсин Нақви ҳужумни кескин қоралаб, болаларнинг ўлимидан чуқур қайғуда эканини билдирган. У жиноятчиларни шафқатга лойиқ бўлмаган “ҳайвонлар” деб атаган. У душман “бегуноҳ болаларни нишонга олиб ваҳшийлик” қилганини айтган.
Балужистон узоқ давом этган қўзғолон майдони бўлиб, у ерда бир қатор сепаратист гуруҳлар, жумладан, 2019 йилда АҚШ томонидан террорчилик ташкилоти деб топилган “Балужистон озодлик армияси” ҳам ҳужумлар уюштирган.
Сўнгги ҳужум Афғонистон билан чегарадош Балужистон вилоятидаги Қиллаҳ Абдуллоҳ шаҳридаги бозор яқинида автомобиль портлаши оқибатида 4 киши ҳалок бўлганидан бир неча кун ўтиб содир бўлди.
Бундай ҳужумларнинг аксариятини “Балужистон озодлик армияси” ўз зиммасига олади, Покистон улар Ҳиндистон томонидан қўллаб-қувватланганини таъкидлайди.
Изоҳ (0)