Вьетнам ҳукумати Telegram мессенжерига киришни бутунлай блоклайди. Бу ҳақда ҳукумат ҳужжатлари билан танишиб чиққан Reuters агентлиги хабар берди.
Телекоммуникация хизматлари провайдерларига Telegram’га киришни блоклаш тўғрисида кўрсатма берилган. Тегишли кўрсатма мамлакат Технологиялар вазирлиги томонидан юборилган. Telegram жиноий фаолиятга қарши курашда ҳамкорлик қилишдан бош тортгани бунга сабаб қилиб кўрсатилмоқда. Худди шундай асослар бўйича Францияда Telegram асосчиси Павел Дуров тергов қилинмоқда.
Технологиялар вазирлиги телекоммуникация компанияларини “Вьетнамда Telegram фаолиятига йўл қўймаслик учун ечимлар ва чоралар кўришга” чақирган. 21 май санаси кўрсатилган ҳужжатга асосан провайдерлар кўрилган чоралар ҳақида 2 июндан кечиктирмай хабар бериши керак.
Киберхавфсизлик департаменти маълумотларига кўра, Вьетнамда фаолият юритаётган мессенжердаги 9 600 та канал ва гуруҳларнинг 68 фоизи қонунчиликни бузади. Улар фирибгарлик, гиёҳванд моддалар савдоси ва ҳукумат тахмин қилганидек, терроризм билан боғлиқ.
Вазирлик вакили таъкидлашича, Telegram’ни блоклаш тўғрисидаги қарор мессенжер жиноий ишлар бўйича тергов доирасида фойдаланувчилар маълумотини ҳукуматга бермаганидан сўнг қабул қилинган.
Шунингдек, Telegram қонунни бузадиган маълумотларни кузатиш, ўчириш ва блоклаш мажбуриятини юклайдиган ҳуқуқий меъёрий талабларни бажармасликда айбланмоқда. Ҳужжатларга кўра, мессенжерда ҳукуматга қарши материаллар тарқатган гуруҳлар ташкил этилгани полиция томонидан аниқланган.
SОАХ компанияга кўра, Telegram 2023 йил июль ойида 800 миллион ойлик фаол фойдаланувчига эга бўлган, бу 2022 йил ноябрь ойидаги 700 миллиондан 14,29 фоизга кўпдир. Premium обунага эга бўлганлар 5 миллион кишини ташкил этади. Вьетнам мессенжер фойдаланувчилари сони бўйича 10 таликка киради:
- Ҳиндистон — 104,0 миллион
- Россия — 34,4 миллион
- Индонезия — 27,2 миллион
- Қўшма Штатлар (АҚШ) — 26,9 миллион
- Бразилия — 21,9 миллион
- Миср — 14,9 миллион
- Вьетнам — 11,8 миллион
Изоҳ (0)