Болливуд бу нафақат юксак кино санъати олами, балки инсонийлик фазилатлари мужассам машҳурларни жамлаган саҳна. Миллионлаб мухлислар севган актёрлар орасида шундай инсонлар борки, улар камера ёруғлиги ўчгандан сўнг ҳам атрофга нур таратишда давом этади. Улар ўзларининг саховатли юраги билан ҳаётга умид бахш этади. Қуйидаги актёрлар исми рейтинг эмас, балки уларнинг жамият ривожи учун қўшган ҳиссасининг эътирофидир.
Приянка Чопра
Гўзаллик танлови ғолибаси, ҳам Голливудда, ҳам Болливудда муваффақият қозонган Приянка Чопра инсон ҳуқуқлари ва қиз болалар тақдири учун жонбозлик кўрсатиб келади. У 2006 йилдан буён UNICEF билан ҳамкорлик қилади, 2016 йилда эса эзгу ният элчисига айланган.
Унинг асосий йўналиши таълим, соғлиқни сақлаш ва гендер тенглик масалаларидир. Чопра маҳаллий ва нодавлат ташкилотларни қўллаб-қувватлаб, минглаб қиз болаларнинг мактабга қайтишига замин яратди. COVID-19 пандемияси даврида ҳам GAVI (Global Vaccine Alliance) билан ҳамкорликда кам таъминланган оилаларга ёрдам берди.
Шоҳрух Хон
Ҳинд киноси қироли сифатида танилган Шоҳрух Хон реал ҳаётда аёллар ҳуқуқи ва эркинлигини ҳимоя қилувчи инсондир. У асос солган Meer Foundation фонди кислота ҳужуми қурбони бўлган аёлларга тиббий, ижтимоий, ҳуқуқий ва психологик ёрдам кўрсатади.
Шунингдек, фонд турли таълим лойиҳалари, шифохоналар ва соғлиқни сақлаш ташаббусларини қўллаб-қувватлайди. Актёр 2018 йилда Жаҳон иқтисодий форумида Crystal Award билан тақдирланган, мазкур халқаро эътироф унинг инсонпарварлик фаолиятининг кучли исботидир.
Нана Патекар
Нана Патекар Маҳараштра штатида яшовчи қурғоқчиликдан азият чекаётган деҳқон ва фермерларга ёрдам бериш мақсадида 2015 йилда Naam Foundation’ни ташкил қилган. Унга ҳамкасб дўсти Макаранд Анауспуре актёрга ҳамроҳлик қилган.
Фонд ҳозиргача минглаб фермер оилаларига молиявий ёрдам кўрсатди. Нана Патекар шахсан ўзи қишлоқларга боради, марҳум фермерларнинг оилаларига бевосита ёрдам беради ва соғлиқни сақлаш лагерлари ташкил этади.
Амитабҳ Баччан
Ҳинд киносининг тирик афсонаси Амитабҳ Баччан саҳнада роллари билан юракларни забт этган бўлса, реал ҳаётда соғлиқни сақлаш ва таълим йўлида беминнат хизмат қилмоқда. У 2002 йилдан буён полиомиэлитга қарши курашда UNICEF’нинг юзига айланган.
Бундан ташқари, у саратон касаллигига чалинган беморлар учун йирик хайриялар қилган, қишлоқлардаги болалар таълимини молиялаштирган ва касалхоналар қурилишида ҳам иштирок этган.
Салмон Хон
Салмон Хон ўзининг инсонпарварлик бренди — Being Human Foundation асосчисидир. Фонд 2007 йилда ташкил этилган бўлиб, Ҳиндистон бўйлаб соғлиқни сақлаш, таълим, озиқ-овқат, кийим-кечак ва бошқа ижтимоий соҳаларда кенг қамровли ёрдам кўрсатмоқда.
Фондга қарашли дўконларда сотилаётган маҳсулотлардан тушган фойда тўғридан-тўғри хайрияга йўналтирилади. Шунингдек, тиббий кўриклар, юрак операциялари, кўз нурини тиклаш ва мактаб таълими лойиҳалари ҳам фонд фаолиятининг бир қисмидир.
Изоҳ (0)