Ҳиндистонда уч кун ичида 11 киши Покистон фойдасига жосуслик қилишда айбланиб ҳибсга олинди. Қўлга олишлар жосуслик фаолиятига чек қўйиш бўйича умуммиллий кампания давомида амалга оширилди. Бу ҳақда India Today хабар берди.
Ҳиндистон расмийларига кўра, айбланувчилар жосуслик тармоғига ижтимоий тармоқлар, хабар алмашиш иловалари орқали, пул мукофоти эвазига ва шахсан Покистонга ташрифлари чоғида жалб қилинган. Қўлга олинганларнинг барчаси 20 ёшдан 30 ёшгача экани айтилмоқда. Ҳибсга олишлар учта штатда — Харяна, Панжоб ва Уттар-Прадешда содир бўлган.
Қўлга олинганлар орасида Покистонга икки марта ташриф буюрган тревел-блогер Жоти Малхотра, шунингдек, “Сиёсатшунослик” факультети талабаси, қўриқчи ва тадбиркор ҳам бор.
Икки давлат ўртасидаги муносабатлар 22 апрель куни Кашмирнинг Паҳалгам ҳудудида юз берган террорчилик ҳужуми сабаб кескинлашди. Ҳужум оқибатида 26 киши ҳалок бўлди. Қуролли шахслар маҳаллий аҳоли ва сайёҳларга қарата ўт очди. Ҳиндистон Покистонни бу ҳужумни қўллаб-қувватлашда айблади. Покистон мазкур даъвони рад этиб, текширув ўтказишни талаб қилди.
Ҳиндистон Покистон билан 1960 йилдаги Ҳинд сувлар тўғрисидаги шартномани тўхтатиб, чегара бўйлаб сув оқимини тўхтатиб қўйди. Покистон бу уруш очишга тенг эканини билдирди. Мамлакат Ҳиндистон билан дипломатик ва савдо алоқаларини чеклади, ҳаво майдонини ёпди ва савдо алоқаларини тўхтатди.
Чегара бўйлаб кичик қуролли тўқнашувлар ва ракета синовлари кўпайди. Покистон қисқа масофали Фатаҳ ракетасини синовдан ўтказди, Ҳиндистон эса хавфсизлик машғулотларини кучайтирди Халқаро ҳамжамият, жумладан Қўшма Штатлар, томонларни зиддиятни эскалация қилмасликка чақириб, дипломатик каналларни тиклашга чақирганди.
Ҳиндистон ва Покистон 10 май куни соат 17:00 дан бошлаб қуруқликда, ҳавода ва денгизда барча отишмалар ва ҳарбий ҳаракатларни тўхтатишга келишиб олди. Бир неча соат ўтгач, томонлар бир-бирини ўт очишда айблади. АҚШ воситачилигида ядро қуролига эга қўшнилар ўртасида келишилган ўт очишни тўхтатиш тартиби ҳозирча сақланиб қолган.
Изоҳ (0)