Хитой май ойида Ҳиндистон билан юз берган тўқнашув вақтида Покистонга ҳаво мудофааси ва сунъий йўлдош орқали ёрдам кўрсатган. Бу ҳақда Ҳиндистон Мудофаа вазирлигига қарашли тадқиқот марказига таяниб, Bloomberg хабар берди.
Марказ директори Ашок Кумарга кўра, Хитой Ҳиндистон қўшинлари ва техникасининг ҳаракатланишини яхшироқ кузатиш учун Покистонга радар ва ҳаво ҳужумидан мудофаа тизимларини янгилашга ёрдам берган. Бундан ташқари, 22 апрелдаги Кашмирдаги ҳужум ва қуролли тўқнашувлар бошланган давр оралиғида Покистонга Ҳиндистон устидаги сунъий йўлдош кузатув имкониятларини яхшилашда ёрдам берилган.
Кумарнинг таъкидлашича, Хитой Покистонга Ҳиндистоннинг ҳаво ҳаракатларига ўз вақтида жавоб қайтариш имконини берган маълумотларни тақдим этган. Ҳиндистон ҳукумати Хитойнинг можародаги иштироки тафсилотларини расман ошкор қилмаган.
Покистон аввалроқ Хитой қуролларидан фойдаланаётгани ҳақида маълум қилганди. Бироқ янги маълумотлар Пекиннинг чуқурроқ иштироки, жумладан, логистика ва разведка ёрдамини кўрсатмоқда. Хитой ва Покистон, шунингдек, расмий Деҳли ҳозирча мазкур хабарга муносабат билдирмаган.
Ҳиндистон ва Покистон ўртасидаги можаро Хитой қуролларининг имкониятларини кўрсатди. Хитой қуроллари икки давлат ўртасидаги воқеалардан кейин юқори самарадорлиги билан эътироф этилди.
Икки давлат ўртасидаги муносабатлар 22 апрель куни Кашмирнинг Паҳалгам ҳудудида юз берган террорчилик ҳужуми сабаб кескинлашди. Ҳужум оқибатида 26 киши ҳалок бўлди. Қуролли шахслар маҳаллий аҳоли ва сайёҳларга қарата ўт очди. Ҳиндистон Покистонни бу ҳужумни қўллаб-қувватлашда айблади. Покистон мазкур даъвони рад этиб, текширув ўтказишни талаб қилди.
Ҳиндистон Покистон билан 1960 йилдаги Ҳинд сувлар тўғрисидаги шартномани тўхтатиб, чегара бўйлаб сув оқимини тўхтатиб қўйди. Покистон бу уруш очишга тенг эканини билдирди. Мамлакат Ҳиндистон билан дипломатик ва савдо алоқаларини чеклади, ҳаво майдонини ёпди ва савдо алоқаларини тўхтатди.
Чегара бўйлаб кичик қуролли тўқнашувлар ва ракета синовлари кўпайди. Покистон қисқа масофали Фатаҳ ракетасини синовдан ўтказди, Ҳиндистон эса хавфсизлик машғулотларини кучайтирди Халқаро ҳамжамият, жумладан Қўшма Штатлар, томонларни зиддиятни эскалация қилмасликка чақириб, дипломатик каналларни тиклашга чақирганди.
Ҳиндистон ва Покистон 10 май куни соат 17:00 дан бошлаб қуруқликда, ҳавода ва денгизда барча отишмалар ва ҳарбий ҳаракатларни тўхтатишга келишиб олди. Бир неча соат ўтгач, томонлар бир-бирини ўт очишда айблади. АҚШ воситачилигида ядро қуролига эга қўшнилар ўртасида келишилган ўт очишни тўхтатиш тартиби ҳозирча сақланиб қолган.
Изоҳ (0)