Покистон бош вазири Шаҳбоз Шариф Ҳиндистонга қарши урушда ғалаба қозонилгани, аммо улар тинчликни хоҳлашини айтиб ўтди.
Ҳиндистонга қарши операция муваффақиятли кечганини қайд этган бош вазир мамлакати доимо тинчлик тарафдори эканини таъкидлади: “Биз душманимизга сабоқ бердик, аммо тажовузкорликни қоралаймиз. Биз бу минтақа ҳам бошқалар каби гуллаб-яшнаган ва илғор бўлишини истаймиз. Бунга эришиш учун тинчликсевар қўшнилар керак, шунингдек, тинимсиз саъй-ҳаракатлар зарур”.
Шаҳбоз Шариф Кашмир муаммосининг ечими минтақада барқарор тинчлик учун муҳим эканини таъкидлади: “Биз учта уруш қилдик, лекин ҳеч нарсага эришмадик. Энди Покистон ва унинг қўшнилари бирлашиб, тинчликсевар қўшни сифатида ҳаракат қилиб, йиллар давомида мавжуд бўлган муаммоларни ҳал қилиши керак”.
Бош вазир Ҳиндистон “қизил чизиқ”ни кесиб ўтганини ва Покистоннинг халқаро тергов таклифини рад этганини таъкидлади. Унинг таъкидлашича, айнан шунинг учун улар 9 майдан 10 майга ўтар кечаси ўз қўмондонлари билан музокаралар чоғида қарама-қарши томонга “зарурий жавоб” беришга қарор қилган.
Шарифнинг айтишича, ўша кечаси маҳаллий вақт билан соат 02:30 атрофида Бош штаб раҳбари Ҳиндистоннинг Покистонни баллистик ракета билан урганини маълум қилган: “У менга жаноб бош вазир, душманга улар ҳеч қачон унутмайдиган тарзда жавоб қайтарайлик, деди”.
Бош вазир Покистон ўша кечада қасос олганини ва кейин фронтнинг нариги томонидан сулҳ бўйича чақириқ бўлганини айтди:
Бош штаб бошлиғи менга “Биз муносиб жавоб бердик, ҳозир улар сулҳ сўраяпти”, деди. Мен: “Душманни қийнаб, сулҳни қабул қилишдан кўра яхшироқ нима бўлиши мумкин?”, деб жавоб бердим.
Изоҳ (0)