Хитой Ташқи ишлар вазири Ван И Пекиннинг Россия ва АҚШ ўртасида Ар-Риёдда эришилган келишувни қўллаб-қувватлашини маълум қилди. Бу Хитой юқори лавозимли вакилининг ўтказилган Россия-АҚШ музокаралари бўйича биринчи шарҳи бўлди.
Хитой тинчликка эришишга қаратилган барча ҳаракатларни, шу жумладан Қўшма Штатлар ва Россия ўртасида яқинда эришилган келишувни қўллаб-қувватлайди ҳамда томонлар ўзаро хавотирларини бартараф этадиган барқарор ва узоқ муддатли ечим топишларини кутмоқда. Хитой томонларнинг сўровларига мувофиқ ва халқаро ҳамжамият, айниқса, глобал Жанубнинг ташвишларини инобатга олган ҳолда инқирозни сиёсий йўл билан ҳал этишда бундан буён ҳам конструктив рол ўйнашга тайёр, дейилади Ван И баёнотида.
Вазирнинг таъкидлашича, Пекин 2024 йил апрелда ХХР раиси Си Цзиньпин томонидан шакллантирган тўртта тамойилга мувофиқ “тинчликни фаол равишда илгари сурмоқда”. Ушбу тамойиллар “тинчлик ва барқарорликни сақлаш”, урушнинг жаҳон иқтисодиётига салбий таъсирини юмшатиш ва камайтириш ҳамда таъминот занжирларининг узилишини олдини олиш зарурлигини ўз ичига олади.
Ван И Ёҳаннесбургдаги G20 саммитида Россия ТИВ раҳбари Сергей Лавров билан учрашди. Россия ташқи ишлар вазирлиги учрашувда Украина масаласи ҳам муҳокама қилинганини маълум қилди, аммо батафсил маълумот бермади. Россия президенти матбуот котиби Дмитрий Песков Владимир Путин яқин кунларда Си Цзиньпин билан телефон орқали суҳбатлашишини маълум қилди.
Жорий йилнинг 18 февраль куни АҚШ ва Россия делегациялари Саудия Арабистони пойтахтида музокаралар ўтказди.
Учрашувда иштирок этган Россия президенти ёрдамчиси Юрий Ушаков музокаралар самарали ўтганини, томонлар келажакда бир-бирининг манфаатларини инобатга олишга келишиб олганини маълум қилди.
Биз шунчаки бир-биримизнинг манфаатларимизни ҳисобга олишга келишиб олдик. Шу билан бирга, икки томонлама муносабатларни ривожлантириш устида ҳам ишлаймиз, чунки бу Москва ва Вашингтон учун бирдек муҳим, деди Ушаков журналистларга.
Делегациялар, жумладан, Россия ва АҚШ раҳбарлари Владимир Путин ва Дональд Трампнинг учрашувини ҳам муҳокама қилишди.
Бу масала кўриб чиқилди, биз бундай учрашув учун шароит яратиш устида ишлаймиз, деди Россия президенти ёрдамчиси.
Унинг сўзларига кўра, музокаралар жараёнида Украина масаласи ҳам кўтарилган. Томонлар “ушбу мавзу бўйича музокарачиларнинг алоҳида гуруҳлари ўз вақтида алоқага киришиши”га келишиб олдилар.
Музокараларда Россия томонидан ТИВ раҳбари Сергей Лавров ва Юрий Ушаков иштирок этди. АҚШ томонидан давлат котиби Марко Рубио, Марказий разведка бошқармаси директори Жон Ретклифф, миллий хавфсизлик бўйича маслаҳатчи Майк Уолц ва махсус вакил Стив Уиткоффлар вакиллик қилди.
Кремлга кўра, музокаралар биринчи навбатда Россия-АҚШ муносабатларини тиклашга, шунингдек, Украина можароси бўйича эҳтимолий алоқалар истиқболларига бағишланган
Изоҳ (0)