Саудия Арабистони пойтахтида АҚШ ва Россия делегацияларининг музокаралари якунига етди.
Учрашувда иштирок этган Россия президенти ёрдамчиси Юрий Ушаков музокаралар самарали ўтганини, томонлар келажакда бир-бирининг манфаатларини инобатга олишга келишиб олганини маълум қилди.
Биз шунчаки бир-биримизнинг манфаатларимизни ҳисобга олишга келишиб олдик. Шу билан бирга, икки томонлама муносабатларни ривожлантириш устида ҳам ишлаймиз, чунки бу Москва ва Вашингтон учун бирдек муҳим, деди Ушаков журналистларга.
Делегациялар, жумладан, Россия ва АҚШ раҳбарлари Владимир Путин ва Дональд Трампнинг учрашувини ҳам муҳокама қилишди.
Бу масала кўриб чиқилди, биз бундай учрашув учун шароит яратиш устида ишлаймиз, деди Россия президенти ёрдамчиси.
Унинг сўзларига кўра, музокаралар жараёнида Украина масаласи ҳам кўтарилган. Томонлар “ушбу мавзу бўйича музокарачиларнинг алоҳида гуруҳлари ўз вақтида алоқага киришиши”га келишиб олдилар.
Музокараларда Россия томонидан ТИВ раҳбари Сергей Лавров ва Юрий Ушаков иштирок этди. АҚШ томонидан давлат котиби Марко Рубио, Марказий разведка бошқармаси директори Жон Ретклифф, миллий хавфсизлик бўйича маслаҳатчи Майк Уолц ва махсус вакил Стив Уиткоффлар вакиллик қилди.
Кремлга кўра, музокаралар биринчи навбатда Россия-АҚШ муносабатларини тиклашга, шунингдек, Украина можароси бўйича эҳтимолий алоқалар истиқболларига бағишланган.
Путин Зеленский билан бир шартга кўра учрашишга рози
Россия президентининг матбуот котиби Дмитрий Песков Путин Украина етакчиси Владимир Зеленский билан музокаралар олиб боришга тайёрлигини, бироқ аввал Украина президентининг қонунийлиги масаласини кўриб чиқиш зарурлигини қайд этди.
Кремль вакилининг сўзларига кўра, Путин “зарурат туғилганда Зеленский билан ҳам музокаралар олиб боришга тайёрлигини бир неча бор айтган”.
Шу билан бирга, Зеленскийнинг ўзининг қонунийлигига шубҳа туғдириш эҳтимоли мавжудлигини кўрсатувчи ҳақиқатни инобатга олган ҳолда, келишувларни ҳуқуқий жиҳатдан расмийлаштиришни жиддий муҳокама қилиш лозим, дея қўшимча қилди Песков.
Владимир Путин бир неча бор Зеленскийнинг қонунийлиги “тугагани, чунки Украинада янги сайловлар ўтказилмагани”ни таъкидлаган.
Москва юридик кучга эга ҳужжатларни имзолашдан аввал “ким билан муносабат ўрнатиш мумкин ва зарурлигини” тушуниб олиши керак, деган Россия етакчиси.
Зеленский 2025 йил 14 февралда Мюнхен хавфсизлик конференциясида сўзга чиқиб, тинчлик музокаралари доирасида фақат ягона россиялик — Владимир Путин билан учрашишини маълум қилган эди.
Бир кун аввал NBC нашри АҚШ Украина делегациясини Саудия Арабистонидаги Россия билан музокараларга таклиф этмагани, чунки Вашингтон Москва ва Киев вакиллари билан алоҳида икки томонлама учрашувлар ўтказиб, кейинчалик қўшма учрашув ташкил этмоқчи экани ҳақида ёзган эди.
Изоҳ (0)