Россия президенти Владимир Путин ва Украина раҳбари Владимир Зеленский урушни тугатишни муҳокама қилиш учун учрашиши мумкин. Кремль матбуот котиби Дмитрий Песков бу қандай ҳолатда амалга ошишини маълум қилди.
Песковга кўра, президентларнинг шахсан учрашуви фақат икки давлат делегациялари ўртасида “муайян келишувларга эришилган” тақдирдагина амалга ошади.
Биз бундай учрашувни икки томон делегацияларининг муайян келишувларга эришишдаги фаолияти натижаси сифатида ўтказиш мумкин деб ҳисоблаймиз. Аммо айнан иш натижаси ва икки томоннинг келишувлари кўринишидаги маълум натижаларга эришилганидан сўнггина, деди Песков.
У Москва учун Украина томонидан айнан ким бундай келишувларни тасдиқлаши муҳим эканини айтди.
Делегациялар келишиб олиши керак бўлган ҳужжатларни имзолашда Украина томонидан уларни ким имзолаши биз учун асосий ва принципиал бўлиб қолмоқда, деди у.
Россия ўт очишни тўхтатишни муҳокама қилиш доирасида Киев учун шартлар тўпламини тайёрламоқда. Песков бу таклифларнинг тафсилотларини ошкор қилишдан бош тортди ва музокаралар ёпиқ тарзда ўтаётганини айтди.
Путин Украина ва Европа Иттифоқининг бир қатор давлатлари томонидан илгари сурилган 30 кунлик сулҳ ташаббусини рад этган эди. Бунинг ўрнига у Истанбулдаги музокаралар форматига қайтишни таклиф қилган. Бунга жавобан Зеленский Путин билан шахсан учрашишга тайёрлигини айтган. Бироқ Россия президенти бунга рози бўлмаган ва музокаралар учун ёрдамчиси Владимир Мединский бошчилигидаги делегацияни Истанбулга юборган.
Зеленский бундай қадамни “Москванинг музокараларга жиддий муносабатда эмаслигини намойиш этиш” деб атаган. Бироқ Украина томони барибир музокараларда иштирок этишга қарор қилди.
Уч йил ичида биринчи марта Россия ва Украина делегацияларининг икки томонлама учрашуви 16 май куни Истанбулда бўлиб ўтди. The Economist нашри ёзишича, Россия томони музокаралар майдончасидан нафақат ўз позицияларини билдириш, балки Харьков ва Суми вилоятларини эгаллаб олиш ниятида эканини айтиб, таҳдид қилиш учун ҳам фойдаланган.
Изоҳ (0)