Истанбулда Россия ва АҚШ делегацияларининг икки томонлама муносабатлардаги “муаммоли масалалар” ва икки давлат элчихоналари фаолиятини тиклаш бўйича музокаралари якунланди. Улар деярли олти ярим соат давом этди.
Музокаралар эрталаб соат ўнга яқин Босфор қирғоғидаги Арнавуткўй туманидаги АҚШ бош консулининг қароргоҳида бошланди. Россия делегацияси музокаралар ўтказилган қароргоҳ ҳудудини Тошкент вақти билан соат 18:20 да тарк этди.
Делегациялар таркиби ошкор қилинмади. Россия ТИВ расмий вакили Мария Захарованинг айтишича, учрашувда Россия–Америка муносабатлари учун масъул бўлган дипломатлар иштирок этган. Россия ташқи ишлар вазири Сергей Лавров музокараларда “юқори даражадаги дипломатлар ва экспертлар” қатнашаётганини таъкидлади.
Учрашув арафасида Лавров учрашув якунлари бўйича Россия–АҚШ муносабатлари “қанчалик тез ва самарали” ривожланиши мумкинлигини айтди. Россия ва АҚШ томонлари муҳокама қилишни режалаштирган масалалар орасида ходимлар сони ва визаларни расмийлаштириш, шунингдек, дипломатларнинг ишлаши учун зарур бўлган банк операциялари бор эди.
Туркиядаги учрашувдан олдин Москва ва Вашингтон ўртасида иккита дастлабки техник алоқа ўрнатилди. Томонлар жорий йилнинг 18 февраль куни Ар-Риёдда бўлиб ўтган музокараларда ўз дипломатик ваколатхоналари штатларини тиклаш зарурлиги тўғрисида келишиб олдилар. Хусусан, Лавровнинг маълум қилишича, Россия ва АҚШ тез орада Москва ва Вашингтонга элчилар тайинланишини таъминлашга келишиб олган.
АҚШнинг Россиядаги ваколатхоналари ходимлари сони 2021 йил апрель ойида президент Владимир Путин дўстона бўлмаган давлатлар дипломатик идоралари фаолиятини чеклаш тўғрисидаги фармонни имзолаганидан бери режали равишда қисқартирилган эди. Улар орасида АҚШ ҳам бўлган. Бунга жавобан АҚШ элчихонаси россияликларга хизматларни чеклади.
Изоҳ (0)