Ёш актриса, модел, инстаблогер Нозанин Гаффарова “Дарё”га махсус интервью берди. У интервью давомида раққосаликни нима сабабдан ташлагани, оилани деб карьерадан воз кечмаслиги ва машҳур телекўрсатувда танқидга учрагани ҳақида гапирди.
“Жароҳат олгач, раққосаликни ташладим”
— Болалигимдан санъаткор бўлишни истаганман. Актриса бўлмаганимда, журналист бўлардим, лекин аниқ санъат ва маданият соҳасини танлардим. Етти ёшимдан бери саҳнадаман, мусиқа мактабига бориб, рақс билан профессионал шуғулланганман. Рақс билан шуғуллансам, маза қиламан, махсус костюмлар жуда ёқади. “Баҳор” ансамблида бир йил профессионал раққоса бўлиб ишладим. Белимдан жароҳат олганимдан сўнг, шифокорлар рақс билан доимий шуғулланишни тақиқлаб қўйди. Соғлиғим сабабли касбимдан кечишга мажбур бўлганман. Баъзи инсонлар раққосаларга нисбатан ёмон муносабатда бўлади. Мен доим маданиятли, рақсни тушунадиган инсонлар даврасида бўлганман. Шу сабабли ҳеч қачон ёмон муносабатга дуч келмаганман, деди актриса.
“Актёрлик маҳоратимдан қониқмайман”
— Санъаткор ўзидан ҳеч қачон қониқмайди. Шу жумладан, мен ҳам ўзимни етарли даражада иқтидорли деб ҳисобламайман. Кечалари ухламай, суратга олиш майдончаларида қолиб кетамиз. Меҳнат ҳам керак, фақат иқтидорнинг ўзи билан иш битмайди. “Ташриф қоғози” бўладиган ролимни ҳали ижро этмадим. Орзумдаги рол — детектив хоним образи. Ёшлигимдан детектив фильмлар кўп кўрганим учун айнан шундай образни гавдалантиришни хоҳлардим, дейди Нозанин.
“Турмуш қуришимни ўйлаб, бундай ролларни рад этяпман”
— Аввал салбий роллардан қўрқмасдим, аксинча салбий образда маза қилардим. Ҳозир эса салбий ролларни ҳам танлаб-танлаб ажратаман. Қаҳрамон нима учун салбийлиги, келиб чиқишига қарайман. Қиз боламан, фақат карьерани, съёмкани ўйлаш хато. Келажагимни ўйлаган ҳолатда, шу қарорга келдим. Томошабинлар, айниқса бизнинг томошабинлар ишонувчан. Шу сабабли ҳам мени ёмон кўриб қолишмасин, турмушга чиқсам бу образларим турмушимга ҳам халал бермасин, деб салбий образларда чиқишни камайтирдим. Бу қароримни тўғри деб ҳисоблайман.
“Энди иқтидор бўлса, диплом шарт эмас. Устозларнинг методлари бу ёғига қўлланилмайди”
— Қўшиқ ҳам куйлайман, бу ҳозирча ҳобби. Кейинчалик балки касбга айланиб кетиши мумкин. Ҳозирча хонандаликка даъвогарлигим йўқ, танлаш жараёнидаман. Қўшиқ куйлашни ўзим жуда яхши кўраман.Вокалдан ҳам дарс олганман. Кейинроқ насиб қилса, альбом чиқариш ниятим бор, аммо ҳозир эмас. Шу пайтгача ҳеч қачон маблағ масаласини биринчи ўринга қўймаганман, қўймасликка ҳам ҳаракат қиламан. Тўғри, пул керак бўлади барибир. Аммо қилаётган ишимни яхши кўриб, чин дилдан бажармасам, дунёнинг пулини берса ҳам қилмайман.
Instagramъда чиқиш учун ҳам одамда актёрлик маҳорати бўлиши керак. Мен ҳамма блогернинг ҳам актёрлик маҳорати бор демайман. Аммо санъат соҳасида ўқимаган бўлса-да, маҳорати ўқиганлардан-да зўрларини кўрганман. Бу нарсага катта актёр-актрисаларнинг ғаши келиши мумкин, бунга ҳақлари ҳам бор. Аммо янги чиқиб келаётган авлодда иқтидор бўлса, ўқиши ва диплом бўлиши шарт деб ўйламайман. Замон ўзгарди, устозларимиз давридаги методлар бундан кейин қўлланилмайди. Интернет ривожланган, буни филтрлаш ҳам имконсиз, деди Нозанин Гаффарова.
“Оила деб санъатдан воз кечмайман”
— Ёшлигимдан орзу қилиб, меҳнат қилиб, кечалари ухламай стрессга тушиб, йиғлаб, овқатланмай қўйиб эришган даражамни ташлаб кетишга, менимча, ҳеч нима арзимайди. Арзирли нарса бор деб ўйламайман. Оилани назарда тутмаяпман. Ҳақиқатдан мени севадиган, уйланмоқчи бўладиган инсон бўлса, қандайдир шарт қўймайди. Орзуларим, карьерам билан бирга севади. Карьерангни ташлайсан, уйда ўтирасан дейдиган бўлса, рози бўлмайман. Бир неча йиллик меҳнатларимнинг мевасини кўраётган вақтимда барига қўл силтаб шундоқ ташлаб кетолмайман. Ҳаттоки бу оила бўлса ҳам. Одамлар нима деб ўйлашининг фарқи йўқ, дейди актриса.
“Болливуд баттл”да қатнашиб, катта негативга учрадим”
— “Болливуд баттл”да қатнашишни шу даражада хоҳлаганманки, уч ой давомида Худодан дуо қилиб сўраганман. Сентябрь ойида менга алоқага чиқиб, кўрсатувга таклиф қилишган. Бу лойиҳа мен учун омадли келди, юзим янада танилди. Санъатнинг ичидаги инсонлардан бекор қатнашибсан, деган гапларни ҳам эшитдим. Лекин ўзим ҳақиқатан маза қилдим.
Негалигини билмайман-у, аммо шу лойиҳадаги иштироким давомида жуда катта негативга учрадим. Буни қабул қилиш жуда қийин бўлди. Партнёримнинг айби Рихситилла Абдуллаевнинг ўғли бўлгани, менинг айбим Рихситилла аканинг ўғли билан шу лойиҳада қатнашаётганим бўлган. Кимдир лойиҳадан чиқиб кетса ҳам, бошқа нарса бўлса ҳам бизнинг видеомиз изоҳига негатив ёзишарди. Instagram ёки YouTubeъда видео чиққач, мингта изоҳ ёзилган бўлса, шундан 900 таси негатив бўларди. Билмайман, нега? Кўп изоҳлар бошқа миллат маданиятни тарғиб қилишда айблаш, менталитет ҳақида бўларди. Ҳали бу қадар катта муҳокамаларга тайёр эмаслигимни шунда тушунганман.
Бу лойиҳада қатнашганимдан ҳеч қачон афсусланмайман. Қариганимда ҳам кулиб эслайдиган хотира ва эмоциялар қолди, дейди Нозанин.
Маълумот учун, Нозанин Гаффарова 2002 йилда туғилган. Ҳозирда у 22 ёшда бўлиб, Санъат ва маданият олийгоҳининг учинчи босқич талабаси.
Суҳбатни тўлиқ ҳолда ДарёLifestyle YouTube саҳифасида томоша қилишингиз мумкин.
Изоҳ (0)