Мактабда муттасил камситилгани боис синфдошларини ёқтирмайдиган машҳурлар (фото)

Синфдошларининг калака қилиши, устидан кулиши ва шунга ўхшаш ҳолатлар юлдузларнинг мактаб даврини эсга олишни истамаслигига сабаб бўлган.

Виктория Бекхэм

Викториянинг бадавлат оилада туғилиб, вояга етгани мактабдагилар уни ёмон кўриши, ҳасад қилишига сабаб бўлган. У вақтда ўзини ёлғиз ҳис қилгани сабаб ҳам Бекхэм хоним мактаби ҳақида умуман эслашни хоҳламайди. У тенгқурлари кўрмаслиги учун мактабдан анча узоқ жойда машинадан тушишга мажбур бўлган. Бугунги кунда севимли рафиқа ва машҳур дизайнер сифатида ўз ўрнини топган Виктория фарзандларига ижтимоий келиб чиқишидан қатъи назар, барчага бирдек яхши муносабатда бўлиш кераклигини таъкидлайди.

Анжелина Жоли

Анжелина болалигида бошқаларга ўхшамаган қиз бўлган. Кўп ҳолларда бошдан-оёқ қора кийиниб, ўлим ҳақида гапирган Анжелинанинг синфдошлари уни ғалати ҳисоблаб, махсус мактабга ўтиб кетишга мажбурлаган. Актриса мактаб йиллари ҳақида гап кетганда, ҳамма унга босим қилгани ва уни ёқимсиз деб билганини маълум қилган.

Кейт Уинслет

Тенгдошлари Кейтни хунук ҳисоблаб, унга озиши кераклигини айтишдан чарчамаган. 15 ёшида вазни 80 бўлган актрисанинг синфдошлари унга ҳатто қўл кўтарган. Бу воқеалардан кейин у мактабдан кетишига тўғри келган. Шунга қарамай Кейт ўзи учун севимли бўлган актрисалик билан шуғулланиб, нафақат кино олами, балки ҳаётда ҳам ўз ўрнини топишга муваффақ бўлган.

Том Круз

Том мактаб йилларида дислексиядан азият чеккан — у ёзиш ва ўқишга қийналган. Шу сабаб синфдошлари уни қолоқ деб атаган. Круз берган интервьюларида унинг битта ҳам дўсти бўлмагани, унга кўп бор зўравонлик қилингани ва ҳар сафар шу ҳолат кузатилганда юраги қинидан чиқиб кетадигандек ҳис қилганини таъкидлаган.

Тильда Суинтон

Бадавлат оқсуяклар оиласида туғилган Тильданинг ота-онаси қизини 10 ёшга тўлганида Кентдаги мактаб-интернатга юборган. Малика Диана билан бирга ўқиган актриса мактабини конслагер билан таққослаган. У таълим жараёни шафқатсизларча амалга оширилгани бундай усул болаларга таълим бермаслигини маълум қилган. «Уларга ота-онаси ва улар бера олиши мумкин бўлган севгиси керак», — деган Тильда.

Квентин Тарантино

Дунёга машҳур режиссёр мактабни ёқтирмагани сабаб ўрта маълумотга ҳам эга бўлмаган. Фильм томоша қилиш ва режиссёрлик фаолиятини таҳлил қилишни ёқтирган Квентин 15 ёшида онаси билан жиддий гаплашиб, ўқув муассасасини ташлашга кўндирган. Аввалига кинотеатрда чипта сотувчи бўлган Тарантино кейинчалик режиссёр сифатида машҳурликка эришган. «Мен мактабни ёмон кўрганман. У ерда ўзимни ёмон ҳис қилганман. Мен ҳатто ўрта маълумотли бўлмай туриб ҳам эришган ютуқларимдан ғурур ҳиссини туяман. Бу одамларни ҳайратга солади. Мен Америка таълим тизимининг мухлиси эмасман. Мактабни шунчалик ёмон кўрганимдан тўққизинчи синфда қочиб кетганман», — деган режиссёр.

Селена Гомес

Мактаб йиллари орқа партада ўтирган Селенанинг тенгдошлари билан суҳбатлашишдан кўра китоб ўқишни маъқул кўргани унинг синфдошларига ёқмаган. «Мактаб йилларини ҳаётимнинг энг яхши даври деб ҳисобламайман», — деган Селена бу вақтда ўзи ҳақидаги фикри салбий бўлганини қўшимча қилган.

Анна Седокова

Рус эстрадаси хонандаси Аннани мактаб йиллари ҳам ҳавас қиладиган даражада ўтмаган. Мактабдошларининг устидан кулиши ва ҳақоратлаши сабаб қўшиқчи бурчакларда беркиниб йиғлаган. Шу боис ўқувчилик йиллари ҳақида эслашни ҳам хоҳламайдиган Анна кунлардан бир куни бундай муаммоларга дуч келган қизларга руҳан далда бериш учун дардини дастурхон қилган. У дўстлари ўйнаб-кулиб юрган бир вақтда молиявий муаммолар сабаб атрофдагиларнинг муносабатидан руҳий тушкунликда бўлганини маълум қилган.